張悦楷講《三國演義》, 073

到咗建安十五年新春，正月初一，孫權喺嗰朝早啊喺朝堂上大會文武百官啊。劉備同孫夫人呢，就睺正呢個時候，入去同吳國太拜年。然後孫夫人就開口喇，佢話：阿媽，夫主因為佢父母祖先嘅墳墓，都喺涿郡嚟，好耐都冇返去家鄉拜過喇，所以一諗起嚟就好傷感。今日係初一，佢想話去江邊向住北方，遙遙噉拜祭一下，而家嚟話畀阿媽聽啊。國太就話喇：哦，呢啲乃係孝道嚟，應該嘅應該嘅。你雖然未曾見過公婆嘅面，你同埋夫主一齊去拜祭下，亦係做人心抱應盡嘅禮啊，你哋去啦吓。得法咯呢勻，孫夫人同劉備叩咗個頭，拜別咗國太立刻走人嘞。呢陣時，只係瞞住孫權唧。夫人係坐車，只係帶住啲隨身嘅細軟。劉備係騎馬，仲有幾個隨從添，快手快腳出咗城，就去同趙雲會合。嗰五百名兵卒前遮後擁就離開咗南徐城，趕路走人喇。當日，孫權飲到大醉，啲侍從人員就扶咗佢返去後堂休息。等到有啲官員探聽到話劉備同孫夫人遁走咗嘅時候，天色已經好夜嘞。噉就快啲去報告孫權啦，哈點知孫權又大醉如泥，嗌極都嗌唔醒。噉及至孫權瞓醒覺嘅時候啊，已經係五更天嘞。到咗第朝早，孫權聽講話走咗劉備唄得了嘅，急急嗌啲文武官員嚟商量啦。張昭就話喇：今日，如果畀此人走甩咗呀，遲早必生禍患㗎，主公，你快啲派人去追佢啦。孫權就吩咐陳武同潘璋兩名大將，叫佢哋挑選五百名精兵，不分日夜，務必要追到劉備捉佢返嚟。噉陳、潘兩個接受咗命令走咗之後，孫權諗起噉都畀劉備走甩咗就嬲到佢不得可了。一手攞起公案上面嘅玉墨硯啊，啪噉掉落地，打到碎晒。程普話嘞：主公呀，你嬲即管嬲，我諗陳武、潘璋，必定捉唔到劉備返嚟嘅。點解呢？郡主自細就喜歡學習武藝，為人嚴毅剛正，所有嘅將官都怕佢嘅。郡主呢次既然肯跟埋劉備去，必定係同劉備好齊心。噉樣去追劉備嘅將官一見到郡主，又點敢下手嘅呢？啊！孫權發火喇，𠻘聲掹出把劍，命令蔣欽同周泰：你兩個就用呢一把劍去攞我個妹同劉備嘅人頭返嚟，違令者立斬！得命！蔣欽、周泰接受咗命令，捧住孫權嘅寶劍啊，立即帶住一千兵馬起程。而家講劉備，佢快馬加鞭拼命趕路，當晚就喺路上休息咗兩個更咁上下時間。即係而家講四個鐘頭左右啦，噉就慌忙起行嘞。睇住就嚟行到柴桑邊界，只見後便塵頭大起，啲人報告話：追兵到喇！劉備慌啊，佢問趙雲話喇：追兵嚟喇，點算好啊？趙雲話：主公你哋行先，我嚟押後。正話轉過前面山腳，弊！有一彪軍馬攔住去路。當先兩員大將大聲高叫：劉備你早早下馬受綁，我奉咗周都督將令，喺度等候多時喇！呢兩員大將係邊個啊？徐盛同丁奉啊。原來周瑜擔心走甩咗劉備，所以一早呢就派徐盛同丁奉率領三千人馬，喺交通要道扎營等候，時常都派人喺高地瞭望。佢哋估計劉備呢，如果係由旱路逃跑嘅就必定要經過呢條路嘅。當日，徐盛、丁奉遠遠望見劉備一行人真係嚟到，就揸住晒兵器攔住去路。嚇到劉備慌晒，連忙勒轉馬問趙雲：哎呀，前便有兵攔截，後便有兵追趕，前後都冇路行喇，點算點算啊？主公唔使慌，軍師有三條錦囊妙計，已經拆開咗兩個，都應驗晒，而家仲有第三個喺度。軍師吩咐落，話遇到危難之時先至好拆開嚟睇，而家到咗危急嘅時候喇，等我拆開嚟睇下啦。於是趙雲拆開第三個錦囊就交畀劉備，劉備睇咗之後，立即行到孫夫人架車度流住眼淚就同孫夫人話：夫人啊夫人，我有啲真心話，到咗而家應該講畀你聽㗎喇。吓，夫君你有咩說話，就請你講明講白我聽啦。夫人啊，往日吳侯同周瑜夾定計，將夫人你嫁畀我，要我嚟東吳就親。呢啲完全都唔係為夫人打算，不過，係想乘機軟禁住我，要搶返荊州嘅啫。搶到荊州之後，必定要殺咗我。所以，佢哋係將夫人你作為香餌嚟釣我劉備啊！我之所以唔怕死亡嘅威脅而嚟到東吳，乃係因為知道夫人有大丈夫嘅廣闊胸懷，一定能夠體諒我。昨日，聽聞吳侯就快要殺我，故此藉口話荊州有難，搵個機會離開東吳返去唧。又咁好彩得到夫人你同意一齊走，但係，而家吳侯又派人喺後便追趕，周瑜又使人喺前便截住。除咗夫人之外，冇人能夠幫我避開呢場大禍㗎喇。如果夫人唔肯應承，噉我就死喺呢架車嘅前便，嚟報答夫人你往日對我嘅恩德係啦，夫人啊！孫夫人嬲嘞：吓？我阿哥既然唔將我當做親骨肉，我亦唔想再見佢喇，今日嘅事，等我嚟解決佢。講完，孫夫人吩咐將架車推出去，捲起車簾。佢一見到徐盛、丁奉就喝佢哋話喇：你兩個想造反係唔係？不敢，不敢！徐盛、丁奉慌忙落馬放低兵器，恭恭敬敬噉企喺孫夫人架車前便話：我哋點敢造反吖，皆因係奉咗周都督將令，喺呢度駐扎兵馬，專門等候劉備咋嘛。呸！我罵聲你個周瑜逆賊，我東吳冇半點虧待過你，吓。玄德係大漢皇叔，係我嘅丈夫，我已經講咗畀母親阿哥知，話要返荊州㗎喇。而家你哋兩個，喺啲荒山野嶺，帶齊人馬，攔住條路。哦哦哦，唔通你哋想搶劫我哋兩夫妻嘅錢財，係唔係啊你？不敢，不敢！請夫人唔好嬲，呢啲都唔關我哋嘅事，乃係周都督嘅將令嚟啊。哼！你哋就係識得怕周瑜，就唔識得怕我係嘛？周瑜殺得你，我唔通唔殺得周瑜咩？跟住孫夫人將周瑜啊鬧到狗血淋頭痛罵一場，就喝啲人推車前進。徐盛、丁奉諗：我哋話晒都係下人，點敢同夫人拗頸㗎，唔係盞攞嚟衰。而且佢哋又見到趙雲呀瞪眉突目，嬲到烚烚聲。哎呀算喇算喇，於是就喝啲兵士散開，放條大路由得劉備、孫夫人佢哋通過。劉備佢哋走咗一陣，陳武、潘璋就追到嚟嘞。徐盛、丁奉啊就將先頭嘅情形講畀佢哋聽，陳、潘兩位將軍就話喇：你哋放咗佢走就錯晒喇！我哋兩個奉咗吳侯嘅命令，特意追嚟要捉佢返去啊。噉我哋快啲追啦，劉備走咗冇幾耐唧，至多行咗五六里路咁上下啦。於是陳、潘、徐、丁四個人，鞭衡隻馬，率領住啲兵卒，搏命咁向前追趕嘞。劉備佢哋行行下，忽然聽見後便嘅吶喊聲呀都唔知幾大聲。劉備同孫夫人話：夫人啊，後便嘅追兵又到喇，點算好啊？夫君你行先，等我同子龍喺後便擋住佢哋啦。好啊，噉我行先喇。劉備帶住三百兵行先，向住江邊嗰便去咗。趙子龍喺架車旁邊，勒馬企定，將啲士兵擺開，等住追嚟嘅人。嚟喇嚟喇，嗰四員將官氣㗾㗾噉追到嚟，見到孫夫人喺度，只有落咗馬，恭恭敬敬立正企喺處。孫夫人話：陳武、潘璋，你哋嚟呢處咩事啊？奉主公嘅命令，嚟請夫人同玄德返去啊。呸！都係你哋呢一班匹夫，離間我哋兄妹使到我哋不和。我已經嫁咗畀人咯，今日出嚟，又唔係同人私奔。我係奉咗母親嘅慈命，叫我哋夫妻一齊返荊州嘅。就算係我阿哥親自嚟，亦都要按照規矩做啊。你哋兩個而家想點啊？係咪恃住兵威想殺我哋夫妻啊？鬧到嗰四個人面懵懵，你望我我望你，佢哋諗：佢一萬年都係兄妹，更兼有國太做主。吳侯又係個孝子嚟，佢點敢唔聽個老母話吖。聽日一反面，錯嘅又唔係我哋？哎不如做個人情罷喇。望一望，喺隊伍裏便又唔見咗劉備。只見趙雲碌大雙眼豎起堂眉，就等緊逳手廝殺嘞。因此陳、潘、徐、丁四個人一味回答話：係係係。噉就退走嘞。孫夫人啊吩咐推車，起行！徐盛見孫夫人走咗之後就話喇：噉喇，我哋四個人，一齊去見周都督，將件事講佢聽啦。噉四個人正喺度猶猶豫豫唔知點做好嘅時候，蔣欽、周泰帶住一支人馬，好似一浸旋風噉啊飛快噉嚟到。佢哋問：你哋有冇見到劉備啊？今朝早行過呢處，已經走咗半日咁耐喇。點解唔捉住佢呢？唉！點捉得住佢吖。於是四個人啊就將孫夫人點樣講法，講返畀蔣欽同周泰聽。蔣欽話喇：吳侯就怕係噉，所以封咗一把劍喺呢處，吩咐我哋先殺佢個妹，後斬劉備，違令者斬啊！哎呀，佢哋去咗好遠㗎喇噃噉點好呢？蔣欽話：佢話晒都係啲步兵，行得快極有限。徐、丁兩位將軍，請你哋飛報周都督，請都督派人由水路棹快船去追。我哋四個人，就喺陸路追趕，無論水路又好，陸路又好，總之追到喇就殺，唔好聽佢講咁多，出發！噉徐盛、丁奉就飛快去報告周瑜。蔣欽、周泰、陳武、潘璋四個將軍，帶住人馬，就沿住江岸猛追。而家講下劉備，佢哋一行人馬而家就嚟到劉郎浦，已經離開柴桑比較遠，劉備個心呢先至稍為定返啲。佢哋沿住岸邊就搵渡船，啊點知，放眼望過去江水茫茫，一隻船都唔見噃。趙雲就勸佢話喇：主公呀，我哋已經逃咗出虎口，而家就快接近自己嘅地界，我諗軍師必定有安排嘅，係乜憂心呢？劉備聽趙雲噉樣一講啊，不但個心冇安樂到，反而一下之間就想起喺東吳所過嘅快活繁華嘅日子，不覺感到淒涼起嚟就流起眼淚添啊。劉備就叫趙雲繼續去前面搵下渡船啦，忽然又接到報告話後便又見到塵土沖天喇噉。劉備即刻行去高頂瞭望下，弊喇！只見一支兵馬蓋地而嚟啊。劉備諗：連氣行咗咁多日，人困馬乏，追兵又到，呢趟呀都唔知點死咯。咦吶喊聲就越嚟越近嘞，慌到劉備手足無措。哎呀，突然間有廿幾隻拖篷船駛到嚟，就停泊住喺岸邊喎。趙雲話：真好彩真好彩，有船喺度，快啲落船！棹咗過對岸再作打算啦。劉備同孫夫人就急急走上船。趙子龍帶住五百名兵卒，亦都上晒船嘞。呢個時候，只見船艙裏便啊，有個着住道士袍嘅人行出嚟，呵呵大笑話：恭喜主公，賀喜主公！諸葛亮喺呢處等候多時喇，哈哈哈哈哈。哎呀，好嘩，原來喺船裏便扮成客商模樣嘅，都係荊州嘅水軍。劉備歡喜咯。冇幾耐，蔣、周、陳、潘四個將軍帶住人馬趕到岸邊嘞。孔明笑住指住佢哋話：哈哈哈，我早就計劃好㗎喇。你哋返去講畀周郎聽，叫佢以後唔好再用美人計喇吓。東吳兵亂箭噉射過去，但係荊州嘅船啊已經駛開咗好遠好遠，蔣欽佢哋唯有眼光光一碌木噉企喺處啦。劉備同孔明呀正在坐船行緊，忽然聽見江面上吶喊連天，咩事呢？回轉頭睇下，嘩嗨，只見無數戰船啊。周瑜坐住一隻戰船，帥字大旗迎風飄揚。佢率領住一支能征慣戰嘅水軍，左有黃蓋右有韓當追緊過嚟。真係勢如飛馬就疾似流星，眼睇住就快追到嘞。孔明吩咐棹埋去北岸，一上咗岸又車又馬開步急走。周瑜追到嚟岸邊，即刻指揮人馬上岸去追。不過呢，只係得啲大將先至有馬騎，所有嘅水兵全部都係靠腳板行路。周瑜一馬當先，黃蓋、韓當、徐盛、丁奉緊緊跟住佢尾。周瑜問嘞：呢處係咩嘢地方啊？有個人回答話：前便就係黃州地界喇。周瑜望見劉備嘅車馬冇行咗幾遠啫，就命令出力猛追。正當追追下，突然一聲鼓響，喺山坳裏便就湧出一彪校刀手，為首一員大將乃係關雲長啊！周瑜一見誒嚇到失魂喇，急急撥馬就走。關雲長啊，追！周瑜死命鞭隻馬，飛跑逃命。跑跑下，左便黃忠右便魏延兩支軍隊殺出嚟，殺到東吳嘅人馬大敗呀。周瑜氣急敗壞，趯返落船，開船離岸。岸上啲荊州兵得意喇齊聲大叫：周郎妙計安天下，賠了夫人又折兵！周郎妙計安天下，賠了夫人又折兵！激到周瑜𨅝𨅝跳啊佢話：返上岸返上岸，同佢哋決一死戰！黃蓋同韓當就竭力勸佢唔好。周瑜諗：哎，我嘅計謀又失敗，我仲有乜嘢面目返去見吳侯呢？哎呀！周瑜大叫一聲，傷口裂開成個𢴈喺船上，不省人事。眾將官急忙救返醒佢，開船逃跑返去東吳。孔明叫唔好追嘞，收兵返去荊州。劉備啊大排筵席賀喜，賞賜三軍將士，呢啲呢就唔多講喇。各位，呢個啊就係孔明二氣周公瑾嘞。周瑜自己返咗去柴桑，呢度呢亦暫時放落唔講佢住。就講下蔣欽佢哋一行人馬，返到去南徐，就將追趕劉備嘅經過報告孫權。孫權嬲到極，想任命程普做都督，立即起兵去打荊州。同時周瑜喺柴桑呢亦有信嚟，請求起兵去報仇雪恨。但係張昭啊苦苦勸諫孫權話：唔好去啊唔好去啊！曹操，係日夜都想住要報赤壁之恨嘅。佢，只係因為怕孫、劉同心協力，故此唔敢興兵嘅啫。如果主公你而家因一時嘅憤怒，同劉備自相吞併，噉曹操必定乘機嚟打我哋，國勢就危險咯。顧雍接住話喇：仲有啊主公，許都唔通冇奸細喺呢度？實有。如果孫、劉不和嘅消息，畀奸細探聽到，報告咗曹操，曹操必定會使人去勾結劉備。劉備又怕東吳去打佢，就一定投靠曹操。如果係噉嘅話，江南都唔知何時何日先至得安寧喇。為今之計呢，最好就係派人去許都，上個表畀朝廷推薦劉備做荊州牧。曹操一見到噉樣，佢實怕，噉佢就唔敢出兵嚟打東吳咯。而且噉樣一嚟，就使到劉備唔會再嬲主公你。然後，我哋再派啲心腹人去用反間計，令到曹、劉互相打起仗嚟，我哋就乘機去謀佢，噉就着數嘞。孫權聽咗一味岌頭，佢話：講得好啱，但係，派邊個做使者好呢？顧雍話：呢度有個人，係曹操十分敬慕嘅，派佢做使者最合適嘞。邊個？華歆喺度，派佢去唔係啱咯？啊冇錯冇錯，孫權好高興啊。於是就派華欽做使者，送表章去許都。華欽去到許都之後，聽見曹操去咗鄴郡，舉行盛大嘅宴會嚟招待文武百官，慶祝銅雀台落成。華欽就趕去鄴郡等候曹操召見。銅雀台就面臨漳河，中央係銅雀台，左便一座叫做玉龍台，右邊一座叫做金鳳台。每一座都十丈高，仲有兩條飛橋將三座高樓連接起嚟，真係千門萬戶就金碧交輝。當時正係建安十五年春天，呢一日，曹操喺慶賀銅雀台落成嘅慶典上。頭戴嵌寶金冠，身穿綠錦羅袍，玉帶珠履，高高在上噉坐喺銅雀台上。文武百官都喺台下畢恭畢敬噉，企喺處侍候啊。曹操呢，佢啊自從赤壁之戰打敗之後，終之無日都想報仇。只係顧忌住孫權、劉備合力聯盟，所以呢先至唔敢隨隨便便進兵嘅啫。之今日銅雀台落成咁大件事啊，曹操亦放低心事，盡情噉慶賀一番。佢今日想睇下啲武官比賽射箭喎。就叫個近身侍衛攞咗一件西川紅錦戰袍，將佢掛喺一樖柳樹嘅樹枝處。下便呢，就擺住一個箭靶，離開箭靶一百步就畫條界，就喺嗰處射箭嘞。噉啊所有嘅武官啊分成為兩隊，凡係曹氏宗族嘅呢，就為一隊，着紅袍；其餘嘅就為一隊，都着綠袍。噉呢兩隊武官呢準備好弓箭嘞，騎上馬就聽候指揮。曹操傳令話：邊個射中箭靶紅心嘅，就將件錦袍賞畀佢；射唔中嘅，罰飲水一杯。號令啱啱一傳落嚟唧，喺紅袍隊裏便啊有個少年將軍，就縱馬跑出嚟。大家睇下，原來係曹休啊。曹休騎住馬飛咁跑，來回跑咗三趟就去到條界嗰處，搭上箭扯滿弓，一箭射過去，喥！正中紅心。當堂呀金鼓齊鳴，人人喝彩。曹操喺高台上面見到呀滿心歡喜啊，佢話：嘩，好嘩，佢真係我哋曹家嘅千里駒啊，哈哈哈哈哈哈哈哈。曹操正話想叫人攞件錦袍賞畀曹休，只見綠袍隊裏便有個人策馬衝出嚟，大聲噉話：丞相嘅錦袍應該等我哋外姓嘅人攞先，同埋宗族嘅，唔應該搶先啊。曹操一望，原來係文聘。噉啊嗰班官員都話喇：好好好，睇下文仲業嘅射法。仲業就係文聘嘅別字嘞。文聘跑住馬，拈弓搭箭一箭射過去，喥噉亦中紅心。大家都喝彩，鑼鼓齊鳴。噉啊文聘大聲噉叫話：快啲攞袍嚟！點知紅袍隊裏便，又有個將軍飛馬而出，高聲大叫啊：文烈射中先嘅，你爭啊點得呢？睇住我同你哋兩個解箭啦。拉滿弓，一箭射過去亦都射中紅心。好嘢啊，大家都齊聲喝彩。呢個將軍係邊個呢？係曹洪啊！曹洪正話想去攞件錦袍，只見綠袍隊裏頭又有個將軍衝出嚟，舉起張弓話：你哋三個人嘅射法，何足為奇啊？睇我射啦！大家一睇，乃係張郃。張郃飛馬翻身，捩轉手喺背後射一箭，喥噉正中紅心。嘩，好嘢呀！四支箭密枳枳噉插晒喺個紅心處，大家都話喇：射得好，射得好！張郃話喇：件錦袍應該係我㗎喇！話口未完，紅袍隊裏便又有個將軍飛馬而出，大叫話你翻身背射有乜嘢稀罕啊，睇住我奪射紅心啦！嘩嗨乜咁大口氣啊，邊個嚟啊？原來係夏侯淵。只見佢策馬跑到條界線嗰度，突然扭轉身一箭射出去，喥噉一聲，正正射中四支箭嘅當中。啊，霎時間金鼓齊鳴啊！夏侯淵叻晒喇，佢勒馬按弓大聲噉話：我呢一箭奪得錦袍嘞啩？未得，仲有人嚟爭啊。只見綠袍隊內有個將軍應聲而出話：留低件錦袍畀我徐晃！夏侯淵話嘞：你仲有乜嘢射法，可以奪得我件袍啊？你奪射紅心，不足為奇，睇我單取錦袍！徐晃彎弓搭箭，向住柳枝射過去，𠻘噉一聲，啱啱就射斷條柳枝，件錦袍就飄落地嘞。徐晃驟馬飛跑過去，個身一彎，執件錦袍，順手就披喺身上，一勒馬，跑到嚟台前行禮：多謝丞相錦袍！徐晃呢一手啊確係好嘢，曹操同眾位官員個個都讚好。徐晃正話想勒馬返轉頭唧，猛然間，喺台邊衝出一位綠袍將軍，大聲噉嗌：你想攞件錦袍去邊處，快啲留低畀我，留低畀我啊！大家一睇，哦原來係許褚。徐晃就話嘞：件袍已經喺我處嘞，你夾硬搶都得嘅咩！許褚都廢事講啊，一縱隻馬飛跑過嚟搶袍。兩隻馬一靠近，徐晃就攞張弓嚟打許褚。許褚力大啊，一手擸住張弓，一拉，嘩，將徐晃成個拉離咗馬鞍。徐晃鬆手，唔要張弓喇，翻身下馬。許褚亦都跳咗落地，兩個人你揪住我我揦實你噼噼啪啪，打起上嚟。曹操急急使人勸開佢哋，哎呀，嗰件新簇簇嘅西川紅錦戰袍呀，已經撕到融融爛爛咯。曹操啊叫佢哋兩個都上台嚟。徐晃啊瞪眉突目，許褚就咬牙切齒硬係仲想打過噉樣，嘿點收科呢趟？

FMT_TIMED_TEXT:A9K2ucmb=13.15 openai.2024-10-31