2014.01.12. Mezurado de la aŭskultado donas gravajn informojn
Por konstati kiom da homoj en kiuj landoj aŭskultas kiun sonartikolon, la retejoj Blogspot kaj Soundcloud disponigas ampleksajn statistikajn datumojn. Tiel eblas ricevi la nombrojn de la vizitantoj sur la retpaĝoj de Blogspot kaj paralele al tio eblas vidi kiom da homoj alklakis la koncernan sonigilon de Soundcloud por ankaŭ aŭskulti tiun sondosieron.
Ĉi-lastaj datumoj estas la plej gravaj, ĉar ne la legado de la teksto kaj la rigardado de la bildoj estas por mi plej interesaj, sed la aŭskultado de sondosiero. Tiu aŭskultado post la sesa de januaro faris salton supren. Mia forta supozo pri la kialo estas ke dum la kristnaskaj ferioj multaj homoj partoprenis internaciajn aranĝojn kaj tial ilia intereso aŭskulti programojn en Esperanto signife kreskis.
Mi ankaŭ konstatis alian fenomenon analizante la laŭlandan aŭskultadon: Kutime Brazilo kaj Francio estas la plej fortaj landoj (laŭ absolutaj nombroj), sed nun Hungario ŝoviĝas al la unua loko. Kaj tio estas vera sensacio, ĉar Hungario havas proksimume 10 milionojn da enloĝantoj, dum Brazilo havas 120 milionojn. La denseco de aŭskultantoj en Hungario do estas almenaŭ la 12-oblo de Brazilo.
Ankaŭ pri tio mi havas fortan supozon kial tio povas esti. En Hungario Esperanto estas elektebla lingvo kiel antaŭfako por universitataj studoj. Miloj da gestudentoj ĉiujare lernas Esperanton kaj plejparte poste denove forgesas ĝin, ĉar mankas al ili la kontakto al la lingvo.
Tiun truon parte ŝtopas la Esperanta Retradio, ĉar ĉiutage aperas nova interesa sonartikolo en digestebla longeco. Tiel Esperanto por gestudentoj fariĝas publike perceptebla. Tio certe levas la prestiĝon de Esperanto, ĉar nun ne plu eblas aserti ke Esperanto ne plu aperas en publikaj komunikiloj kiel lingvo por aktualaj temoj kiuj estas interesaj por homoj de diversaj aĝogrupoj.
Bedaŭrinde ĝis nun mankas ĉia kontakto kun la hungaraj geaŭskultantoj. Ili nek komentas nek skribas retmesaĝojn al la retpoŝta adreso de la Esperanta Retradio, kiu estas retradio@aldone.de . Por mi estus ege interese trovi hungaran kunlaboranton resp. kunlaborantinon kiu almenaŭ jen kaj jen verkas sonartikolon kaj registras koncernan sondosieron.
La konstanta aŭskultado de radioelsendoj en Esperanto, precipe se temas pri altnivelaj tekstoj, havas grandan edukan valoron kaj post iom da tempo kapabligas lingvajn talentulojn aktive partopreni en la produktado de radioelsendoj. Kunlaboro kun aliaj E-parolantoj je loka kaj internacia niveloj donas grandan subtenon por tio. Do se vi sentas emon paroli en retradio, ne hezitu kontakti kunlaboranton de la Esperanta Retradio.
