La batalo kontraŭ viruso en Ĉeĥio
Fine de februaro mi volis veturi al Provenco. Mia buso haltus en Milano, do mi regule observis ĉiujn novaĵojn el tiu loko. La situacio en Italujo ne estis favora. Post kelkaj tagoj mi decidis nenien veturi. La junuloj (ĉiuj, kiuj sentis sin junaj) devis esti en Alpoj, ĝui etoson de granda mondo. Multaj revenis ĝuste antaŭ la tempo de kvaranteno de tuta lando – infektitaj.
Ek de la 9-a de marto la ĉeĥa registaro ordonis porti maskojn (por protekti buŝon). Mi kviete aŭskultis pri tio, ĉar mi ne vizitadas ofte aliajn homojn, mi povas resti hejme kaj - oni vidos. Sed mia parencaro kaj amikoj sendis al mi fotojn de rapide kudritaj maskoj. Ĉiu fieris pri sia produkto. Do ankaŭ mi komprenis, ke necesas ion kudri. Mi kudris maskojn por mia familio. Ek de la 10-an de marto mi ricevis multe da mesaĝoj, kiuj ŝercas pri maskoj. Ankaŭ en televido ili varbis: Mia masko protektas vin, via masko protektas min.
Ek de la 16-a de marto nia lando kvarantenis. Homoj ne povis renkontiĝi, ili povis veturi nur al laborejo, vendejo kaj reveni hejmen por ne disvastigi malsanon. Preskaŭ ĉiuj homoj restis hejme. Nur la „unua linio“, tio estas kuracistoj, flegistinoj kaj preventejo (higieno), vendistoj, ankaŭ poŝto, elektro kaj gazoservoj funkciis. Aliaj ripozis hejme, ĉar ankaŭ la fabrikoj fermiĝis. La ŝercoj multiĝis: oni parolis pri la komuna tempo hejme, kiam homoj devas alkutimiĝi vivi kune. Kelkajn el ili mi tradukis por vi:
- La kronviruso komenciĝis en Ĉinio meze de decembro. En Ĉeĥio ĝi alvenis la 1-an de marto. Estas klare, ĝin alveturigis la Ĉeĥa poŝto.
- Dankon al nia dunganto, kiu nin salajras. Li savis nian vivon, ĉar alie ni venus skii en Italujo.
- En via vivopriskribo vi havas spacon, ĉe la jaro 2020. Kion vi faris? - Mi lavis miajn manojn.
- Ĉu vi certas, ke kunfermi edzon kaj edzinon hejme por dekkvar tagoj estas solvo, kiel malkreskigi nombron de viktimoj?
- La unuan fojon vi povas savi la homaron kuŝante antaŭ televido. Do ne merdigu ĝin.
- Mi pensas, ke la kronviruson mendis virinoj: neniu futbalo, neniu restoracio, neniu kunveno kun amikoj. El laboro bele rekte hejmen.
- Kaj tiel al virinoj plenumiĝis ilia sonĝo: Li ne povas iri en restoracion. - Kaj al viroj: Finfine ŝi ekkuiras. - La komuna sonĝo: Ja ne mortigi sin!
- Greta Thunberg: Unu viruso kaj mi perdis mian famon. Mi envias ĉinojn. - Kato: Ek de mia junaĝo mi bone scias, ke mi devas lavi miajn manojn. - Malbono devas esti forpelita per malbono (ĉeĥa biero nomita Corona). Baldaŭan liberan vivon al ĉiuj! Sed dependas de via protektado kontraŭ viruso, ne streĉu vin!
