至 like 交通 工具
今日 係 一年一度 嘅 香港 交通 工具 比賽 ， 主要 由 貢獻度 同 like 數 嚟 決定 ， 每 次 只會 公佈 頭 十 名 。 大家 聚 埋 一齊 ， 關係 好 嘅 已經 傾 起 上嚟 。
「 點 呀 輕鐵 ， 頭耷耷 噉 冇 精神 ， 畀 啲 信心 自己 啦 ！ 」 地鐵 安慰 輕鐵 。
「 唉 ， 我 都 唔明 ， 電車 同 我 明明 咁 似 ， 點解 佢 拎 咗 咁 多 年 第三 ， 我 就 永遠 排 咁後 ！ 」 輕鐵 覺得 大家 都 係 沿住 路軌 慢慢 行 ， 只係 負責 嘅 地區 唔同 ， 甚至 自己 嘅 載客量 比 電車 仲要 高 ， 但 排名 永遠 都 唔及 電車 ， 越 諗 越 委屈 ！
當 地鐵 仲 想 安慰 輕鐵 嘅 時候 ， 佢 嘅 勁敵 出現 喇 —— 就 係 巴士 ！
「 地鐵 ， 又 係 同 你 決一死戰 嘅 時候 喇 ！ 」
「 今年 多咗 屯馬線 ， 我 好 有 信心 贏到 你 ！ 」
雖然 巴士 同 地鐵 每 年 都 爭 第 一 、 二 名 ， 但 其實 佢哋 嘅 感情 一啲 都 唔差 ， 因為 佢哋 都 覺得 冇 咗 對方 唔 得 —— 大家 都 係 走遍 港九新界 為 市民 服務 ， 少 咗 一 個 ， 另 一 個 都 未必 撐 得 住 。
地鐵 係 輕鐵 最 好 嘅 朋友 ， 輕鐵 知道 自己 多少 係 叨 咗 地鐵 嘅 光 ， 先 摱車 邊 上 到 榜 。 佢 黯然 行 埋 一 邊 ， 點知 就 咁 唔好彩 遇到 電車 ！ 電車 有 種 港島區 獨有 嘅 高傲 ， 佢 都 唔係 第一 次 笑 西北 係 鄉下 地區 㗎 喇 ：
「 輕鐵 ， 不如 你 退賽 啦 ， 有時 畀 人 搞錯 我 係 你 呢個 大嚿 衰 ， 我 真係 覺得 好 失禮 囉 。 」
「 喂 你 唔好 咁 過份 喎 ！ 輕鐵 都 為 香港 付出 咗 好多 㗎 ！ 」 地鐵 即刻 走 過嚟 為 輕鐵 出頭 。
「 唉 呀 ， 大佬 嚟 嗱 ？ 我 走先 喇 ， 話晒 港島線 最近 已經 夠 多 風波 —— 」
「 你 再 蝦 佢 ， 我 聽朝 就 畀 啲 顏色 你 睇 ！ 」
明明 原本 係 輕鐵 同 電車 之間 嘅 爭執 ， 唔 知 幾時 變 咗 地鐵 欺壓 電車 。
「 肅靜 ！ 」 天星 小輪 爺爺 一 出聲 ， 大家 立即 粒聲 都 唔敢 出 。 爺爺 喺 國外 極 具 人氣 ， 但 佢 一啲 都 唔 囂 ， 咁多 年 嚟 都 係 以 主持人 身份 參與 ， 極 具 威嚴 。
「 既然 大家 咁 積極 ， 我哋 就 提早 公佈 結果 啦 ！ 」
「 首先 ， 要 頒 個 特別 服務獎 ： 山頂 纜車 。 」 聽到 天星 小輪 爺爺 讀出 自己 個 名 ， 山頂 纜車 爺爺 即刻 嚇 到 彈起 。
佢 又 驚 又 喜 噉 話 ： 「 呵呵呵 ， 估唔到 我 一把 年紀 仲 有 獎 攞 ， 希望 大家 之後 都 多多 支持 下 後生仔 昂坪 360 啦 ！ 」 纜車 喺 隔籬 怕怕醜醜 噉 耷 晒 頭 ， 場面 就 好似 長輩 拖 住 細蚊仔 。
然後 天星 小輪 爺爺 拎出 今年 嘅 排名表 ， 每 個 名 下面 都 有 小小 嘅 評語 ：
1 . 地鐵 ： 唔使 轉 嚟 轉 去 真係 好 方便 ， 加密 啲 班次 就 更 好 。
2 . 巴士 ： 有 公路 站 係 方便 咗 ， 但 幾時 先 可以 唔 塞車 ？
3 . 輕鐵 ： 原來 屯天元 都 有 好多 景點 ； 輕鐵站 有 靜 嘅 郊區 又 有 嘈 嘅 市區 。
4 . 電車 ： 香港 人 嘅 回憶 就 係 叮叮 ， 好多 明星 都 喺度 拍嘢 ！
5 . 渡輪 ： 放假 去 離島 、 放工 過海 ， 都 舒服 寫意 ！
6 . 私家車 ： 出 唔到 關 就 遊 勻 香港 啦 ， 舒適度 第一 ， 不過 冇 位 泊車 扣 晒 分 ！
7 . 電單車 ： 大家 都 兩 個 轆 ， 梗係 揀 架 唔使 自己 郁 ！
8 . 飛機 ： 真係 好 想 去 旅行 ！ 冇得 去 都 要 懷念 下 搭 飛機 嘅 感覺 ！
9 . 小巴 ： 每 一 次 嗌 有 落 都 係 膽量 測試 ！
10 . 的士 ： 唔兜路 就 快 囉 ！ 過海 又 未必 有得 搭 ！
排名 一 出 ， 有人 開心 有人 唔 啹 。
「 點 會 噉 㗎 ， 點解 我 會 輸 俾 大嚿衰 㗎 ？ ！ 」 電車 似乎 冇 辦法 接受 賽果 。
「 電車 ， 你 呢啲 就 叫 夜郎自大 喇 ！ 其實 國外 嚟講 ， 輕鐵 係 好 受 歡迎 同 方便 㗎 ， 只係 香港 人 求 快 為主 ， 就 可能 睇低 咗 。 而家 多 咗 人 賞識 ， 我哋 應該 要 戥 佢 高興 ！ 」 輪船 終於 忍唔住 出聲 ， 因為 飛機 太 忙 ， 成日 嚟 唔 到 ， 所以 場內 唯一 有 資格 同 大家 分享 世界 見聞 嘅 大 長輩 就 只 有 輪船 。
「 你哋 兩 個 真係 好 應該 向 地鐵 同 巴士 學習 ， 為 方便 市民 而 做 良性 競爭 ， 而 唔係 單單 嘅 比較 ！ 何況 你哋 特性 咁 似 ， 應該 情 同兄弟 先 啱 ！ 你 要 諗 下 ， 少咗 你哋 是但 一 個 ， 當區 市民 就 慘 啦 ！ 」
輕鐵 同 電車 都 慚愧 到 耷晒 頭 ， 虛心 受教 。
「 計 我 話 乜 都 假 ， 最 緊要 服務 到 香港 市民 ！ 」 的士 大佬 豪氣 打圓場 。
「 唔知 點解 由 出名 拒載 嘅 的士 大佬 講 呢 句 —— 」 「 好似 冇乜 說服力 …… 」
