張悦楷講《三國演義》, 054

曹操啊決定出動五十萬大軍，去攻打劉表、劉備吖。太中大夫孔融，就勸諫佢唔好出兵，曹操嬲起上嚟就趕佢出丞相府。孔融行出咗大門口啊就仰天長歎：唉！不仁不義，點會唔失敗㗎。哈哈，孔融呢句說話就好衰唔衰，畀御史大夫郗慮嘅一個家客聽到，就返去學畀郗慮聽嘞喎。呢個郗慮呢，因為平時啊，成日咁畀孔融睇唔起嘅，所以就含恨在心。而家有噉嘅機會呢就將孔融講呢句說話就報告畀曹操知，而且仲煮重佢米，佢話：丞相，平時孔融成日都抵毀丞相你嘅，佢同禰衡係好朋友。禰衡讚孔融係仲尼不死，孔融呢，就讚禰衡係顏回復生喎。以前，禰衡噉樣侮辱丞相，都係孔融唆使佢㗎。曹操聽咗嬲到不得了，即刻就命令廷尉去逮捕孔融。廷尉呢，就即係嗰啲司法官嘞。孔融有兩個仔，年紀仲係好細嘅唧，當時正喺屋企嚟捉緊棋。有啲人知道咗消息，就急急嚟話佢兩個聽喇：令尊呀畀廷尉捉咗去，就要殺喇，兩位公子快啲避開啦。佢兩個仔話：避都冇用嘅，破巢之下安有完卵啦？果然，話口未完，廷尉已經嚟到嘞，捉晒孔融嘅家屬同兩個仔，全部殺晒。同時呢，將孔融嘅屍首就擺喺街市示眾。有個人，叫做脂習，佢竟然伏喺孔融嘅屍體處喊噃。曹操知道咗當然好嬲定啦，又想殺埋佢。荀彧就話嘞：丞相，我聽講脂習經常都勸孔融嘅，話佢為人太過剛直，容易闖禍。而家，孔融死咗咯，佢嚟喊孔融乃係個有節義之人啊，唔好殺佢啊！曹操噉就冇殺脂習。收尾，脂習就收咗孔融父子嘅屍體，葬咗佢哋。曹操殺咗孔融之後，就傳令五隊軍馬喇依照次序出發，留返荀彧等等啊守衛許昌。呢處呢，就暫時放落唔講住。而家講下荊州劉表。佢嘅病情危急，就派人去請劉備嚟委託後事。劉備就即刻帶住關羽、張飛趕去荊州見劉表啦。劉表就話喇：賢弟啊，我，已經病入膏肓，好快就死㗎喇。誒而家，要將啲後事委託畀賢弟你啊。我嘅仔冇才能，恐怕，唔能夠繼承我嘅基業。啊我死咗之後，賢弟你自己接管荊州啦吓。劉備就喊住跪喺處話喇：兄長，誒，小弟必定會竭力輔助賢侄，唔會有其他嘅意思嘅，兄長你放心啦。正喺度講緊，有人嚟報告話曹操呀親自率領大軍嚟緊喇噉。劉備就急急辭別劉表，漏夜趕返去新野。劉表知道咗呢個消息呀驚到不得了啦，就搵人商量要寫遺囑，要劉備輔助長子劉琦啊做荊州之主。蔡夫人知道咗就嬲嘞，即刻閂實內門，叫蔡瑁、張允兩個守住外門。當其時啊，劉琦呢正在鎮守江夏，知道父親病危嘞，就返嚟荊州探病嘞噃。點知一到外門唧，蔡瑁就攔住佢話喇：公子，你奉命鎮守江夏，責任極重。而家公子你擅離職守，如果東吳兵到噉點算啊？如果公子入去見到主公，主公必定會嬲嘅，一嬲親，病情就會加重，噉就唔係孝順喇。公子應該快啲返去啊。劉琦冇晒辦法，就唯有企喺門外大哭一場，然後上馬返去江夏。劉表嘅病勢越嚟越危險，佢一直盼望劉琦嚟嘅，盼極都盼唔到。到咗八月，戊申日就大叫幾聲，噉就死咗喇。劉表一死，蔡夫人就同蔡瑁、張允兩個商量好，寫一張假遺囑，話要立第二仔劉琮做荊州之主，然後呢就舉哀報喪。劉琮呢個時候，先至係一十四歲，人就幾聰明。佢就召集齊啲文武官員嚟，研究下點樣應付今後嘅嚴重局勢。佢話喇：父親過咗身咯，我大哥而家喺江夏，更兼玄德叔父喺新野。你哋立我為主吖，假如大哥同叔父興兵嚟問罪，噉點同佢哋解釋好呢？有個幕官叫做李珪佢行出嚟回答話喇：公子講得好啊！應該火急發哀書去江夏，請大公子做荊州之主，同時叫玄德一齊理事。噉樣呀，北可以敵曹操，南可以拒孫權，呢個乃係萬全之策啊！蔡瑁就喝佢話嘞：呸！你係咩嘢人啊？咁大膽竟然胡言亂語，反對主公嘅遺命係嘛？李珪亦大聲痛罵佢嘞：你裏裏外外勾結起嚟搞陰謀，偽造遺囑廢長立幼。眼睇住荊襄九郡，都斷送喺你哋蔡氏之手啊，故主有靈，必定殺咗你啊！蔡瑁畀佢噉樣揭底，嬲到不得了。即刻叫啲衛士推佢出去斬咗佢。李珪確係有骨氣噃，到死嘞，仲係罵不絕口。噉啊斬咗李珪呢，就再冇人敢提出異議嘞，於是蔡瑁啊，就立劉琮為主。蔡氏宗族嘅人就分別統領荊州嘅兵馬，掌握晒軍事大權。跟住就任命治中鄧義、別駕劉先就守衛荊州。治中同埋別駕呢都係官名咯。蔡夫人親自同埋劉琮去襄陽坐鎮，就嚟到防禦劉琦、劉備。呢啲事呢，都係瞞住劉琦同劉備做嘅，所以啊連劉表安葬喺襄陽城東，都冇發訃告畀劉琦同劉備嘅。噉啊當劉琮去到襄陽，啱啱安頓好唧，就接到報告話曹操率領大軍，向住襄陽嚟緊嘞。劉琮驚到極喇，就請蒯越、蔡瑁佢哋嚟商量對策。東曹掾傅巽就建議話喇：主公啊，不但曹操兵馬嚟值得憂慮啊，而家大公子喺江夏，玄德喺新野，我哋都未去報喪嘅。如果佢哋興兵問罪，噉荊州、襄陽就危險咯。之下官有一個辦法，可以令到荊襄嘅民眾啊就安如泰山，又可以保存主公嘅名聲同爵位。噉有咩嘢辦法呢？主公，不如將荊襄九郡獻畀曹操，噉曹操必定會重待主公㗎。呸！呢啲係乜嘢說話啊！我承受先君嘅基業，坐都未坐穩，噉就送咗畀他人？蒯越話喇：傅君嘅說話講得啱。事關逆順有大體，強弱有定勢。而家曹操南征北討，用嘅都係朝廷嘅名義。主公你如果抵抗佢，就其名不順，講唔過去嘅。況且主公你係新新作為荊州之主，外患未平內憂又起啊。荊襄嘅民眾一聽聞話曹兵嚟到，都未曾打咋就膽都寒晒，噉仲點能夠同佢哋作戰呢？劉琮話：各位所提嘅意見都好好，唔係話我唔想聽。唯獨是將先君嘅基業一下就送咗畀他人。我，我就係怕會畀天下人恥笑啊。劉琮啱啱講完，有個人理直氣壯噉話：佢哋兩位嘅說話講得非常之好，點解唔聽佢哋講嘅做呢？大家一睇，此人原來姓王名粲字仲宣，係山陽高平人。王粲嘅容貌瘦弱，身材矮細。但係噉噃，佢極之聰明好記性嘅喎。呢佢細時啊，有一次去見中郎蔡邕。當時蔡邕正係高朋滿座，一聽見話王粲到喇噉，喇喇聲就行出去迎接佢，嘿急到呀，連鞋都冇着好，調轉隻鞋着，就噉踢住就行嘞。嗰班賓客都好奇怪啦就問：蔡中郎為咩事咁敬重呢個小子呢？蔡邕話：呢位先生有非常獨特嘅才能啊，我都唔及佢㗎。王粲呢個人呀，見聞好廣博，記憶力啊特別叻，冇人及得佢。有一次喎，佢喺路邊見到有個石碑。石碑上面刻住嗰啲碑文，哈佢就噉望一次唧，就全部記得清清楚楚可以背返出嚟嘅，嚱你話叻唔叻呢？仲有啊，佢睇人哋捉棋，如果將棋局搞亂，佢可以同你擺返出嚟，一隻子都冇錯嘅。佢又精通算術，佢個文詞呀妙絕一時。佢十七歲嘅時候，朝廷想征召佢出嚟做官，任命佢做黃門侍郎，佢唔肯做。後嚟呢，因為避亂就嚟到荊州，劉表將佢作為上賓噉留住佢喺處。當日，佢就表示贊成傅巽同蒯越嘅意見。佢仲問劉琮話：將軍，你自己估計一下，你比唔比得過曹公呢？哦，比唔過佢吖。噉就係喇，曹公兵強將勇足智多謀。喺下邳生擒呂布；喺官渡摧毀袁紹；喺隴右趕走劉備；喺白狼擊敗烏桓。總之，畀佢剷除掃蕩嘅英雄都不計其數。而家，曹公率領大軍南下荊襄，勢難抵敵。傅君、蒯君兩位嘅意見，乃係長遠之計。將軍你唔好遲遲疑疑，免至將來後悔莫及啊。劉琮話：先生嘅教導好啱，不過，仲要稟告母親知道至得。劉琮話口未完，只見蔡夫人喺屏風後便行出嚟話嘞：既然佢哋三位都係所見相同咯，仲何必稟告我呢？一於聽三位先生話啦。於是劉琮就決心投降嘞。佢寫好一封降書，叫宋忠就秘密噉送去畀曹操。宋忠啊接受咗命令，一直去到縣城就遇到曹操大軍。他啊求見曹操，將封降書呈送畀佢。曹操極之歡喜啊，重重噉賞賜宋忠。又吩咐佢，返去話畀劉琮聽，叫佢出城嚟迎接，噉就畀佢永遠做荊州之主噉。宋忠就完成咗任務嘞，就告辭曹操，就一路返去荊襄啦。當佢嚟到江邊，正要渡江嘅時候，突然間，遇着關雲長帶住一支人馬喺度巡查喎。宋忠啊避都避唔切，就畀關雲長嗌住，盤問佢關於荊州嘅事情。收尾畀關雲長左盤右問問到佢唔講唔得嘞，就唯有穿煲係啦就將前前後後嘅事，一五一十噉講晒出嚟。關雲長聽咗啊大吃一驚：噉仲得了嘅？即刻就捉住宋忠，將佢帶咗返去新野見劉備，將全部嘅情況報告畀佢知。劉備一聽呀憂心到極喇，佢喊起上嚟啊。張飛就話喇：事到如今，不如先斬宋忠，跟住起兵渡江，奪咗襄陽殺咗蔡氏同劉琮，然後同曹操打過啦。劉備話：你講少句啦，我自有斟酌㗎喇。宋忠。劉將軍。你知道佢哋做啲噉嘅事，點解唔早啲嚟報告我呢？今日就算斬咗你，亦無濟於事，你快啲扯啦。啊！多謝將軍不殺之恩，不殺之恩啊。宋忠執返條命抱頭鼠竄趯返去襄陽。當劉備正喺度憂愁到不得了嘅時候，咁啱劉琦啊派伊籍嚟求見。劉備啊好感激伊籍嗰次通水佢聽，救過佢，所以就親自行出嚟迎接，再三多謝。佢哋入到嚟大廳坐落之後伊籍就話喇：大公子喺江夏聽聞話佢父親已經逝世，而蔡夫人同蔡瑁佢哋合謀，唔嚟報喪，竟然立咗劉琮為主噉。大公子派人去襄陽探聽係真係假，果然係真嘅。大公子怕使君你唔知，所以特意叫我送哀書嚟。並且請使君你點齊麾下嘅精兵，一齊去襄陽問罪啊。劉備睇完信，就對伊籍話：先生，你只係知道佢哋夾硬立咗劉琮做荊州之主。你都仲未知道，劉琮已經將荊襄九郡，獻咗畀曹操喇。吓？有噉嘅事咩？使君你點知㗎？劉備就將捉到宋忠嘅事講畀佢聽。伊籍就話嘞：如果係噉，使君你不如以吊喪為名，去到襄陽，氹劉琮出城嚟迎接你。出其不意捉住佢，將佢啲同黨殺清光，噉一嚟荊州就屬於使君你㗎喇。孔明亦都好同意啊，孔明話喇：講得啱啊，主公你聽佢話啦。但係劉備唔肯，佢流住眼淚話喇：啊吓，我嘅兄長臨死嘅時候，將兩個仔托付畀我。如果我而家捉咗佢嘅仔搶住咗佢個地方，噉，噉第日我死於九泉之下，仲有咩嘢面目見我兄長吖？孔明就話：而家曹兵已經到咗宛城。如果唔係噉樣做，又點對付敵人啊？宛城啊，誒就喺今日河南省南陽市附近。佢嘅位置就喺新野以北，距離又唔遠嘅。劉備話嘞：不如走去樊城避一避曹操嘅兵勢啦。當佢哋喺度商量研究緊嘅時候，探馬嚟報告話曹兵已經到咗博望嘞。劉備連忙打發伊籍返去江夏整頓軍馬。伊籍一走，佢又同孔明研究點樣嚟應付目前呢個危急局面嘞噃。孔明話：請主公放心，上次一把火燒咗夏侯惇大半人馬。今日曹操又帶兵嚟，好，一定要佢又試中我呢條計。我哋確實唔能夠喺新野住落去嘞，不如早啲去樊城啦。劉備同意咗，孔明就派人喺四道城門張貼榜文。通知老百姓話：無論男女老幼，凡係願意跟隨嘅，就喺今日，跟住一齊去樊城暫時躲避，唔好自誤噉。同時啊又派孫乾去河邊，調撥船隻救濟百姓。就派糜竺先行護送各個官員嘅家眷去樊城。然後，孔明就召集一班將領嚟到下達命令嘞。首先係叫關羽：關將軍。在。你帶領一千人馬，去白河嘅上游埋伏好。兵士每人都要帶住裝滿沙泥嘅布袋，要嚟塞住白河上游嘅河身。到咗第二日，晚上三更以後，一聽見下游有人喊馬嘶嘅聲音，就馬上攞起布袋，放水沖落去浸下游嘅曹兵，然後就順水殺落嚟接應啦。得令！關羽去咗嘞。其次啊吩咐張飛：張將軍。在！你帶領一千人馬，喺博陵渡口埋伏，呢個渡口嘅水勢最慢，曹軍畀水浸以後一定會逃跑到呢度嚟嘅。等曹軍一趯到嚟，就趁勢殺出嚟接應。得令！張飛去咗嘞。第三個係吩咐趙雲：趙將軍。在！你帶領三千人馬，分成四隊。你自己帶一隊喺東門外便埋伏好。其餘嗰三隊，就分頭喺西、南、北三門埋伏。事先呢，喺城內人家嘅屋頂上面，收藏定多啲硫磺硝石等等引火嘅材料。曹軍一入城，一定係住喺啲民房裏便嘅。到咗聽日下午，個天必定會翻風。等到一翻風，喺西、南、北三門埋伏嘅人馬，就將火箭射入城裏便。等到城內火勢大喇，就喺城外吶喊助威，只係留一座東門放曹兵逃走。趙將軍你自己喺東門外便等住，曹兵一出嚟，就喺背後打佢。等到天光之後，你就會合埋關、張兩位將軍，收咗兵一齊去樊城啦。得令！趙雲又去咗嘞。然後孔明又命令糜芳、劉封兩個人：你哋帶領二千人馬，一半打紅旗，一半就打青旗，去新野城外三十里嗰個鵲尾坡前面駐扎。一見到曹兵嚟，紅旗軍向左走，青旗軍向右走。曹兵一定疑心，唔敢嚟追。你哋兩個就分頭埋伏好，只要一望見城裏便起火，就衝出嚟追殺大兵，然後，就去白河上游嗰度接應啦。得令！糜芳、劉封就去咗喇。孔明一個個都安排妥當之後，就同劉備搵一笪地勢高嘅地方，上去上便瞭望啊等待捷報嘞。而家講下曹仁同曹洪啊，佢哋率領十萬人馬作為前隊。許褚帶住三千名鐵甲兵做開路先鋒，浩浩蕩蕩殺奔新野而嚟。呢一日嘅中午時分，許褚就嚟到鵲尾坡嘞。只見前面一紮人馬，打住青旗紅旗嘅。許褚立即催促部隊迎上去。劉封同糜芳呢就按照孔明嘅囑咐，將人馬分成四隊。青旗、紅旗就各歸左右。欸呀，許褚一見，果然疑惑起嚟，勒定馬，吩咐停止前進嘞。佢話：前便，一定有埋伏，部隊就喺呢處扎營啦。安排好隊伍，許褚立即騎馬趕返去就將情況報告畀曹仁聽。曹仁就話喇：哎，呢啲不過係疑兵嚟唔會有埋伏嘅。你要趕快進兵，我馬上就帶領大軍趕上嚟接應。當許褚再返去鵲尾坡，佢就帶兵直殺入去啊入到樹林裏便，哈，搵嚟搵去，哈，人影都唔見一個噃。呢個時候啊已經紅日平西嘞。許褚正話想繼續前進，忽然間，聽見山上面滴滴答答，查砰查砰查砰噉大吹大擂。抬頭一望，只見山頂上面一紮軍旗。當中有兩把大羅傘啊，左便係劉備，右便係孔明。兩個人打對面坐喺處飲酒喎，哈真係滋悠喇。嘩！可惱呀！許褚嬲到極，帶住軍隊搵路上山。但係山上面又猛咁煨啲擂木啊炮石落嚟，就冇辦法上得去。山後呢，又傳嚟一陣陣喊殺嘅聲音。許褚想搵條路殺上去，但係呢個天已經開始黑嘞。曹仁率領大軍嚟到，佢吩咐先奪取新野城，喺度宿營歇馬。當大軍嚟到城下，咦？只見四道城門都打開晒。喎嗬噉衝入去。一啲抵擋都遇唔到，連人影都冇見一個，呵呵，原來竟然係一座空城。曹洪就話嘞：劉備已經係計窮力竭，故此就帶晒啲百姓逃走。我哋就喺城裏便住一晚先，聽朝一早就進兵啦。曹兵呢陣時已經行到疲乏不堪，攰黎黎喇，個肚又餓到咕咕聲。一聽見話喺度住落休息唄，咪執輸，一齊去搶返間屋過夜，然後就煮飯食嘞。曹仁同曹洪呢，就住喺縣衙門裏便嚟。打咗初更之後，呼呼聲翻起大風。突然間，守門嘅士兵飛跑嚟報告畀曹洪聽話發生火燭。曹仁就話喇：呢啲一定係啲士兵煮飯嘅時候唔小心，燒着嚟嘅啫，唔好自相驚擾。曹仁話由未了啊，接二連三噉嚟咗幾次報告，話西門、南門、北門，三門都起火啊。曹仁就知道唔妥喇，即刻下令撤退。等到各個將官上馬嘅時候，已經滿城大火燒到通紅嘞。各位啊，今晚呢一場大火啊，燒得比博望波嗰次厲害過多多聲啊。曹仁帶住成班將官，喺啲火堆裏頭飆嚟喘去，搏命咁韞路趯。佢聽講話東門嗰便冇火，就急急混東門衝咗出去。嗰啲兵卒呀你推我㧬互相踐踏，都唔知踩死幾多人。曹仁佢哋啱啱喺火陣裏便逃咗出嚟，只聽見後便一聲吶喊，趙雲帶住兵衝殺過嚟嘞。呢一班殘兵敗卒一味顧住各自逃命，邊處仲肯回身同你打過吖。正在搏死命趯緊，哈糜芳又帶住一支兵馬嚟到，又衝殺咗一陣。曹仁就輸到貼地喇，見路就趯啊，哈哈，點知又撞正劉封，畀劉封截住殺咗一輪，一直打到四更，真係人困馬乏。嗰班兵卒，大半都焦頭爛額不成人樣。佢哋一趯到白河嘅河邊，好彩噃，啲河水唔係几深呀，啱晒，連人帶馬湧晒落河搵水飲。呢陣時呀，人又嘈馬又叫噓巴嘈閉。而家講下關羽，佢喺白河嘅上游，將啲沙袋啊截住啲水。等到黃昏，遠遠就望見新野城內起火咯。一直等到四更，哈，真係聽見下游嗰便人喊馬嘶。關羽立即下令，將沙袋一齊搬開。嘩！水勢滔天啊！瀡噉向住下游猛衝落去。大水一到，將逼住喺河裏便飲水嘅曹軍人馬一下就浸住，浸死嘅人就不計其數喇。曹仁帶住嗰班將官搏命向住水勢緩慢嘅地方搶路逃跑，都唔知幾辛苦先至趯到嚟博陵渡口。突然間聽見一陣喊殺嘅聲音，一隊人馬攔住去路。當先一員大將呀正係張飛，張飛大聲喝話：曹賊快嚟送死！一拍隻馬舞起長矛就殺過去。混戰咗一場，打打下，遇到許褚，嗨啱喇！呢個係對手喇。張飛掉開其他嘅敵人，就縱馬過嚟同許褚交鋒。但係許褚都無心戀戰，打咗幾個回合，爭取到時間保住曹仁佢哋走咗。佢就撥轉馬頭走埋一份喇。張飛就冇去追，只係去迎接咗劉備、孔明就一齊去白河嘅上游。喺嗰處，劉封同糜芳啊早就準備好船隻等住嘞。噉大家一齊渡過咗河，燒晒啲船，就轉移去樊城嘞。

FMT_TIMED_TEXT:A9K2ucmb=12.09 openai.2024-10-31