2014.01.07. Nova telfero en Rio allogas turistojn
Nova telfero en Rio allogas turistojn
Antaŭ du jaroj mi prezentis sonartikolon pri telfero en Medellín, Kolombio. Oni tie konstruis telferon por pacigi urbokvartalojn en kiuj regis la organizita krimo. Tiu telfero tre sukcese forigis la krimon kaj kondukis al prospero de la enloĝantoj de la koncernaj urbaj kvartaloj. Tiu ekzemplo inspiris la respondeculojn de la urbo Rio de Janeiro ankaŭ tie konstrui tute similan telferon. Jen la raporto pri ĝi:
La statuo de Kristo kaj la Sukerpana monto estas la plej konataj allogaĵoj por turistoj en Rio de Janeiro. Sed ili ricevis konkurencon. Telfero kiu kondukas de la jaro 2011 tra la fama-fifama urba kvartalo "Complexo do Alemão", allogas pli kaj pli da turistoj.
Laŭ unu el la plej konataj blogistoj de Brazilo - Ancelmo - la telfero de la "Complexo do Alemão" superas intertempe dum sabatoj kaj dimanĉoj ĉiujn rekordojn pri vizitantoj. Antaŭ mallonge laŭ li 18- ĝis 20-mil turistoj vizitis kaj uzis la telferon. La mezuma turista frekvenco situas ĉe 9- ĝis 10-mil en unu tago.
La telfero estis inaŭgurita dum julio 2011. Ĝi havas longecon de 3,5 kilometroj kaj kunligas kvin staciojn. En ĉiu el la 152 vagonoj ĝis 10 homoj povas trovi lokon. Traveturo daŭras 15 minutojn.
La Complexo do Alemão estas areo el 13 mizerkvartaloj en la norda zono de la urbo. Ĝi apartenis ankoraŭ je la komenco de tiu ĉi jardeko en Rio al la plej danĝeraj kvartaloj, en kiuj drogobandoj regadis.
Dum novembro 2011 polico kaj militaraj fortoj plenumis perfortan operacon por liberigi la komplekson de drogobandoj. Intertempe la komplekso estas konsiderata kiel praktike pacigita.
La telfero estis unuavice konstruita por plibonigi la publikan mallongdistancon trafikon por la enloĝantoj de la mizerkvartaloj. Por ili la uzado de la telfero estas senpaga.
Sed evidente ankaŭ turistoj malkovris por si tiun allogaĵon. La turisma agentejo Rio Turismo Legal ofertas turismajn pakaĵojn en kiuj la veturo per la telfero kaj promeno tra la mizerkvartalo estas inkluzivaj en la prezo de la pakaĵo. Ĝi kostas 40 realojn (R$).
La telfero funkcias dum labortagoj de la 6-a ĝis la 21-a horo, dum sabatoj de la 8-a ĝis la 20-a, kaj dum dimanĉoj kaj festotagoj de la 9-a ĝis la 15-a.
Vi povas spekti ankaŭ jutuban filmeton pri la telfero tie ĉi:
