張悦楷講《三國演義》, 038

關公千里迢迢送兩位嫂嫂嚟到古城。聽講話張飛喺度唄，就非常之歡喜，以為呢趟可以兄弟重逢啦。點知同張飛一見面，張飛舉起長矛就刺過嚟。關公大吃一驚，連忙閃開啊：三弟！你做乜嘢！你唔記得桃園結義嘞咩？嘿！你無情無義，仲有乜嘢面目嚟見我！我點樣無情無義呀？哼！你背叛兄長降咗曹操侯賜爵，今日又嚟呃我？哼！我要同你拼個你死我活啊！看槍！三弟你唔好逳手住！原來你唔知呀，我講你亦唔信。而家，有兩位嫂嫂喺處，三弟你自己去問阿嫂啦！兩位夫人聽見關公同張飛喺度霎緊氣，張飛又話要打要殺，就掀開車上嘅窗簾嗌張飛喇：三叔呀，三叔為咩事要噉呢？阿嫂你哋坐住先，睇我殺咗呢個忘恩負義嘅人，然後請阿嫂你哋入城 . 甘夫人話嘞：三叔你聽我講咋，二叔因為唔知道你哋嘅下落，故此暫時喺曹操嗰度棲身啫。而家知道咗你大哥喺汝南嚟，就不避險阻，護送我哋去搵你大哥，一直嚟到呢處呀。三叔你千祈唔好錯怪二叔啊！糜夫人亦話：二叔嗰陣喺許都在係出於無奈嘅咋。張飛話喇：阿嫂好畀佢哋呃咗你呀！開講有話：忠臣不事二主，大丈夫寧死不辱吖嘛。關公話喇：三弟，你唔好冤枉我啊！孫乾呀幫關公解釋啦：雲長係特意嚟搵將軍你㗎。連你亦都亂噏一通！佢邊度係嚟搵我咁好心㗎？佢要嚟捉我就真！唉三弟，我如果要嚟捉你，噉我都要帶軍隊嚟至得㗎嘛！你睇，軍隊唔係嚟緊嘞咩！關公捩轉頭一望，哈，果然見到後便煙塵起處，一彪人馬追緊嚟。嗰啲風吹到軍旗拂下拂下，正係曹軍嘅旗號啊！張飛嬲到頭殼出煙呀，豈有此理！而家你仲敢詐諦？看槍！三弟你唔好逳手！你睇住我斬咗呢個追緊嚟嘅將官，嚟表白我嘅真心啦！好啦，你如果係有真心，我呢處打完三通鼓，就要你斬咗呢個來將！關公應承。冇幾耐，曹軍嚟到嘞，為首一員將官乃係蔡陽啊。佢挺刀縱馬大聲噉喝話：大膽關羽！你過關斬將，殺咗我外甥秦琪，原來逃跑嚟咗呢一處！我奉丞相命令特意嚟捉你呀！關公一句說話都唔講，舉刀就斬。張飛親自擂鼓，氹氹氹氹氹氹氹氹氹氹哈！只見一通鼓都未完唧，關公嘅青龍刀刀光一閃，蔡陽嘅人頭已經落地。嗰班兵士嘩走啊！噉就搏命咁趯。有個擔大旗嘅小卒走唔切，畀關公一手捉住，關公問佢：蔡陽係點嚟嘅？嗰個小卒話：誒誒自，嗯嗯，蔡蔡，嗯。蔡陽聽聞將軍殺咗佢嘅外甥，誒就就好嬲啦，誒誒，要去河北同將軍你打過。誒，但係丞相唔肯，誒誒就派佢去汝南攻打劉辟，誒誒估唔到，嗯估唔到嚟到呢處遇着將軍嘞。好喇，公聽咗就拉佢去到張飛面前，叫佢從頭到尾再講一次。然後張飛又盤問嗰個小卒，問佢關公喺許都嘅情況。嗰個小卒就有乜講乜，講清楚嘞，張飛呀噉先至相信咋。正喺度講緊，忽然間城裏便有個軍士跑嚟報告話：南門外便有十幾個人騎住馬飛咁快跑緊嚟呀，唔知係咩人呢？張飛個心又思疑起上嚟嘞，即刻就跑過去南門嗰便睇下。果然見到十幾個人騎住馬，輕弓短箭呀跑緊嚟。嚟到個時候，佢哋見到張飛立刻滾鞍下馬。咦？係咩人呢？原來係糜竺同糜芳。張飛亦都落馬同佢哋見面嘞。糜竺話：自從喺徐州失散咗，我哋兩兄弟逃難返咗去鄉下。收尾使人到處去打聽消息，先至知道雲長啊投降咗曹操，主公係去咗河北。後嚟，又聽講簡雍亦都去埋河北嘞噉。啊就係冇將軍你嘅消息，唔知你去咗邊處。尋日，喺路上撞見一幫客商，話有個姓張嘅將軍係噉噉噉模樣嘅，而家佔據住古城啊。我哋諗呢個實係將軍你嘞，所以特登嚟搵下，哈咁好彩，果然搵到嘞！張飛話：雲長二哥同阿孫乾護送兩位嫂嫂，啱啱嚟到，已經知道大哥嘅下落喇。吓！好咯好咯！張飛帶住糜竺、糜芳一齊去見關公，參見兩位夫人。跟住，張飛就請兩位嫂嫂同大家入城。返到去衙門坐落，敬完茶，兩位夫人，將失散之後呀，關公所經歷嘅事講畀大家聽。呢一勻呀，張飛就感動到放聲大哭啊！跪低叩頭參拜佢二哥。糜竺、糜芳聽咗啊十分傷感，猛咁唞大氣。張飛呢，亦都將離別之後，自己嘅情形講畀大家聽，一便就吩咐大排筵席，嚟賀喜。第日，張飛就想同埋關公一齊去汝南搵劉備。關公就話喇：你唔好去，你保護住兩位嫂嫂暫時喺古城住，就等我同孫乾去探聽兄長嘅消息先啦。張飛話噉好吖，於是關公同孫乾帶住幾個人，日夜兼程趕去汝南。去到之後見到劉辟同龔都，關公就問嘞：皇叔喺唔喺處呀？劉辟話：前幾排皇叔呀嚟住過幾日，為因見到呢處人馬太少，所以又返咗去河北袁本初嗰處嘞喎。哎呀！滿懷希望嚟到，估話見到大哥嘅啦，點知又唔喺處，關公啊真係弊翳咯。孫乾話嘞：將軍唔使咁憂慮嘅，我們至多再辛苦一趟，又試去過河北，搵到皇叔，一齊去古城就係啦。都唯有係噉係啦，有乜辦法啊。於是就辭別咗劉辟、龔都，返到去古城，將呢件事就講畀張飛聽。張飛又想跟埋去河北咯喎。關公話嘞：有呢一座城池，就係我哋安身立腳嘅地方，唔能夠隨隨便便放棄呀。仲係等我同孫乾去袁紹嗰處，搵到大哥嚟呢處團聚仲好啦。三弟你留低，堅守古城就啱嘞。不過噉噃，二哥，你殺咗佢顏良、文丑兩員大將，你點去得㗎？唔緊要嘅，去到我可以隨機應變。跟住關公就叫周倉嚟問佢：臥牛山裴元紹嗰處，總共有幾多人馬？大概有四五百啦。我而家行近路去河北搵兄長，你呀去臥牛山，招埋呢一支人馬喺大路嚟接我哋啦。遵命！周倉接受咗命令就去咗嘞，呢處暫時唔講佢。而家講下關公、孫乾，只係帶咗二十幾個人，馬不停蹄夜咁趕路去河北。呢一日，已經嚟到冀州邊界。孫乾話：將軍你唔好入城住，啊，就喺呢處附近搵地方住落先，等我入去見到皇叔再算啦。關公覺得噉樣做係妥當啲喎，就打發孫乾入城，自己呢，就帶住啲隨行人員，行去附近一座莊院投宿。去到嘞，有個伯爺公篤住條拐杖行出嚟，同關公作咗個揖，問咩事噉。關公就如此如此噉講佢聽個伯爺公話：哦，真係啱喇，我亦係姓關嘅，叫做關定啊。將軍嘅大名早就耳聞咯，今日咁好彩能夠見面啊關將軍，請入嚟。關定老伯請咗關公一行人入去，叫兩個仔出嚟拜見關公，擺酒招待。噉關公一行人呢就喺關定嘅莊院住落嘞。而家再講下孫乾。佢單人匹馬入咗冀州城搵到劉玄德，將最近呢一段經過講咗畀佢聽。玄德就話嘞：簡雍亦喺呢處嚟呀，我哋靜靜請埋佢嚟商量下啦。冇幾耐，請到簡雍嚟嘞，噉啊一齊商量點樣脫身嘞噃。簡雍話：噉唔難嘅，嗱，主公你聽日去見袁紹。就係講要去荊州說服劉表，一齊起兵去打曹操，噉就可以乘機脫身啦嘛。哦，呢個辦法妙極喇！不過你能唔能夠跟埋我一齊走呢？主公放心啦，我自有脫身之計㗎喇。商量妥當之後，第二日，劉備就走去見袁紹嘞。佢話：劉景升鎮守荊襄九郡，兵精糧足。如果同佢定個約一齊去攻打曹操，就最好不過嘞。袁紹話：我曾經派過使者去約過他嘅，無奈佢唔肯呢。此人同我係同宗，如果我去同佢講，佢必定唔會推托嘅。如果得到劉表幫手，噉就勝過劉辟多多喇玄德公，噉就勞煩你辛苦一趟呢。哦，我應當效勞嘅。係嘞，最近我聽講關雲長已經離開咗曹操，想嚟我哋河北噃。如果佢嚟嘅話，我一定要殺咗佢，同顏良、文丑報仇雪恨啊！哎呀！以前明公話要用佢，所以我就叫佢嚟吖。為咩嘢而家又話想殺咗佢呢？而且顏良、文丑就好比兩隻鹿，而雲長係一隻猛虎啊！失咗兩隻鹿，而得返一隻猛虎返嚟，仲有乜嘢怨恨喇？哦，哈哈哈哈哈哈哈哈哈哈，我其實啊非常之愛佢，先頭我係故意講下笑唧。玄德公，唔該你再使個人去叫佢快啲嚟啦。噉等我即刻使孫乾去叫佢嚟啦。好極，好極喇！劉玄德辭別咗袁紹行出去，簡雍跟住尾就入去見袁紹，佢話：玄德呢趟走咗，必定係有去冇回頭㗎喇。我係想跟埋佢去，一來可以一齊說服劉表，二來又可以監視住玄德啊。袁紹一諗有道理，就叫簡雍同埋劉玄德去荊州。簡雍走咗之後，郭圖就勸袁紹嘞：主公，上次劉備去說劉辟都冇成功，而家主公你又使佢同簡雍一齊去荊州，佢實唔返嚟㗎喇。你唔使咁多疑心嘅，簡雍會做㗎喇。袁紹噉樣講郭圖有咩辦法呢，講白晒㗎啦袁紹都唔聽，嘿嘿，唯有歎口氣走人係啦。劉備呀叫孫乾出城去通知關公先。佢就同簡雍，正正當當噉向袁紹辭行，上馬出城。去到邊界，孫乾已經喺度等住嘞，就帶佢哋去到關定嘅莊院。關雲長喺大門口迎接玄德大哥，跪低拜咗幾拜。劉玄德扶起佢，兩個人揸住手喊到爭啲唔收得聲呀。喊完跟住就笑咯，經歷過咁多風險又重逢，梗係高興啦。大家入去草堂坐落，噉啊關定老伯呢叫佢兩個仔出嚟拜見劉玄德。劉備問佢哋叫做咩名啊噉。關公就話嘞：呢個係老伯嘅大仔叫做關寧，學文；呢個係第二仔關平，學武嘅。關定老伯就話：我呀好想叫個第二仔跟隨關將軍，唔知肯唔肯收留佢呢？劉玄德問：幾多歲呀佢？十八喇。既然老伯有意咯，我二弟仲未有仔，等我二弟收咗令郎做仔呢好唔好啊？關定歡喜到不得了，就叫關平認咗關公做父親，叫玄德做伯父嘞。噉啊真係喜上加喜呢今日。劉玄德怕袁紹一下變卦，派兵嚟追佢就弊嘞，所以就唔想逗留，叫大家快啲執拾好走人。關平啊跟隨住關公一齊起程嘞，關定送大家行咗一站路，灑淚而別，自己返屋企，呢啲呢就唔講佢喇。關公帶住大家，一齊行去臥牛山啦。呢一日，行行下，忽然間見到周倉負咗傷，帶住幾十人嚟到。關公帶佢拜見咗劉玄德，就問佢點解會搞成噉樣㗎噉。周倉話嘞：喺我去到臥牛山之前呢，就有一個將官，單人匹馬去到，同裴元紹打，一個回合唧就刺死咗裴元紹。招降晒所有嘅人馬，就佔據咗山寨。我本來係去臥牛山，要招啲人馬嚟㗎，就係得呢幾十個人敢跟我嚟，其餘嗰啲呀都怕咗佢唔敢嚟呀。我啊唔忿啦，就同嗰個將官打過啦。點知連氣畀佢打贏咗幾次，我個身都中咗三槍，故此，故此就走嚟報畀主公知啦。劉玄德問：嗰個人點樣㗎，叫做咩名呢？嗰個人呀好雄壯嘅，唔知叫做咩名呢。既然係噉樣咯，於是周倉帶路，關公一馬當先，劉玄德在後，就直奔臥牛山。去到嘞，周倉喺山腳啊大聲叫罵。冇幾耐，只見嗰個將官呀全身穿住盔甲，揸住長槍，帶住一班人飛馬落山。劉備遠遠望見就認出嚟喇，他大聲噉嗌：來人係唔係趙子龍啊？嗰個將官一見到劉備，哎呀噉一聲，連隨跳咗落馬，喺路邊跪低就拜。啊！原來果然係趙子龍啊！劉備、關公都落咗馬，噉大家見過禮，就問佢點解會嚟到呢處㗎噉。趙雲話：自從同使君分別之後，點知道公孫瓚啊唔聽人勸，以至兵敗自焚。袁紹呢，好多次使人嚟叫我去，我諗，袁紹亦唔係個用人嘅人喇，因此呀冇去到。後嚟我想去徐州投奔使君你，收尾又聽講徐州失守，雲長已經投降咗曹操，使君又喺袁紹嗰處。我好幾次想去投奔你嘅，就係怕袁紹見怪所以冇去成。一直就係噉啦，四海飄零，無地容身。前嗰排，偶然經過呢處撞啱裴元紹落山嚟想搶我嘅馬，畀我殺咗佢，就佔咗呢個山頭，喺處落腳啦。最近聽聞翼德喺古城就好想去搵佢，又唔知真定假，今日喺呢處遇見使君真係好彩呀！劉備極之歡喜呀，佢同關公都將自己呢一段時期嘅事，講畀趙雲聽。劉備話喇：我初初見到子龍嘅時候，就好唔捨得離開，今日相遇幸運到極啊！趙雲話嘞：我奔走四方，總係想搵到一位有作為嘅主公為佢效力。我見過咁多人，冇一個及得使君你嘅。今日能夠跟隨你實在係大慰平生，就算係肝腦塗地死無餘恨啊。於是趙雲即日就放火燒咗山寨，率領全部人馬跟隨劉玄德去古城。張飛、糜竺、糜芳迎接咗劉玄德佢哋入城之後，少不免呀各自講一番離別之後嘅情形，笑完又喊喊完又笑啦。兩位夫人就將關雲長嘅事呀，詳詳細細噉講晒畀劉玄德知，哎，劉玄德啊好感激關公。呢個細佬呀認真講義氣呀。當日，張飛吩咐劏牛殺馬，首先就拜謝天地，然後慰勞全軍將士。劉玄德見到兄弟重逢，文武官員一個都唔少，仲新新得咗趙雲添。關公呢又得咗關平、周倉兩個人，無限咁歡喜啦，於是就連氣幾日，大排筵席開懷痛飲嘞。呢，有詩為證喎：當時手足似瓜分，信斷音稀杳不聞。今日君臣重聚義，正如龍虎會風雲啊。喺呢個時候，劉備、關羽、張飛、趙雲、孫乾、簡雍、糜竺、糜芳、關平、周倉，噉啊率領馬步軍兵啊總共四五千人。兵力呢，就確係少得可憐咯，但係總算係一支力量啊，係打天下嘅本錢嚟喎。劉備呢本來就想放棄咗古城去守汝南嘅。咁啱劉辟、龔都呢就派人嚟請，嘿！啱晒喇。劉備即刻下令起兵去汝南駐扎，招軍買馬，圖謀發展。呢啲呀不在話下。而家講返袁紹。佢見到劉備一去不回頭，可惱也啦，就要起兵去打佢。郭圖勸佢話：劉備誒不足為慮嘅，曹操係個勁敵，唔剷除佢就唔得。劉表雖然霸住荊州啫，之仲唔係強盛。至於江東孫伯符，佢威震三江，地連六郡，謀臣武將極多，我哋應該派人去聯結佢，一齊嚟進攻曹操啊。袁紹同意郭圖呢個分析，就寫一封信，派陳震做使者帶一封信去江東會見孫策嘞。孫策啊，佢就獨霸江東，兵精糧足。喺建安四年，即係公元一九九年嘞，亦即係，啊，呢個曹操許田射獵啊，煮酒論英雄呢一年嚟。孫策就奪取咗廬江，打敗咗劉勛。豫章太守華歆呢，喺孫策強大嘅軍力威脅之下，亦都向孫策投降。噉從此呀聲威大振啦，就派張紘去許昌，呈送一份報捷嘅表章畀朝廷。曹操見到孫策發展得咁迅速、咁強盛，佢都話喇：孫策好似隻獅子仔噉啊，啊要制服佢就難咯。唔能夠用兵力制服又點啊？有辦法嘅。曹操就叫曹仁嘞，將個女許配畀孫策嘅細佬孫匡，孫曹兩家結成姻親。曹操呢又留張紘喺許昌。但係噉喎，孫策啊要求封佢做大司馬，曹操啊冇應承佢，孫策噉就嬲嘞，從此呢就有攻打許昌嘅心嘞。吳郡嘅太守叫做許貢，佢就摸到孫策呢個心水。佢偷偷地，派個使者帶封密信去許都送畀曹操。封密信嘅內容呢就係話：孫策呢個人呀十分勇猛而且有野心。朝廷對佢呀應該表面上給予榮譽，將佢留喺京師做官至啱。千祈唔好放佢喺外便獨霸一方以為後患喇噉。噉啊當嗰個使者，帶住呢封密信渡江嘅時候呢，就畀喺江邊防守嘅兵士捉住，解咗佢去見孫策。孫策睇咗嗰封密信嬲到不得了啊。殺咗個使者，跟住就派人詐家意請許貢嚟，話有事商量。許貢就烏瀡瀡嚟嘞喎，孫策𢴈嗰封密信出嚟：哼！你想送我去死地呀？立即就命令刀斧手將許貢勒死。許貢嘅家屬呢，知聲得快，冚𠾴唥逃走晒就冇遇害，噉啊好彩嘞。許貢有三個食客噃，一心想為許貢報仇，之一直都未曾有機會。有一日，孫策帶住一隊軍隊去丹徒嘅西山打獵。忽然間，趕咗隻大鹿出嚟，好歡喜啦，孫策就縱馬上山一路追實嗰隻鹿。追追下，只見樹林裏便有三個人帶住弓箭揸住長槍企喺處。嗯？孫策見到呢三個人好面生嘅就勒定隻馬問佢哋嘞：你哋係咩人啊？我哋係韓當嘅兵士，係呢處射鹿呀。孫策就不以為意啦，踢一踢隻馬就行嘞噃。點知其中有個人，舉起長槍對住孫策隻左腳就猛刺過去。孫策大吃一驚，急急掹出把劍對嗰個人斬過去。哈！弊嘞，嗰支劍身就忽然啪聲斷咗，只係剩返個柄喺手嚟。呢個時候，有個人拈弓搭箭𠻘噉一箭射過嚟，正中孫策塊面。哎呀！孫策一手喺臉上掹甩支箭，攞起張弓就用返呢一支箭射返剛才放箭嗰個人。嗰個人噼啪一聲，當堂僂低。噉嗰兩個人呢，舉起長槍，對住孫策啊亂咁㓤，大聲噉嗌：我哋係許貢嘅食客，今日特登嚟為主人報仇雪恨啊！當時孫策呀乜嘢兵器都冇嘅，就得一張弓，就唯有用把弓嚟到抵擋啦。一便招架一便走，嗰兩個人呀死打爛打死戰不退。孫策個身畀佢哋㓤咗幾槍，匹馬亦都負咗傷。正在十分危急嘅時候，好在程普帶住幾個人嚟到，孫策大嗌話殺賊啊！程普帶住啲人，一齊衝上去，將許貢呢兩個食客呀斬成肉醬。回過頭嚟睇睇孫策，哎呀，弊傢伙！只見孫策血流滿面傷勢好嚴重。程普用刀喺戰袍上面割咗一幅出嚟，同孫策包扎好傷口，然後幾個人夾手夾腳啊救咗佢返去。當時孫策喺吳會養傷，使人去搵華佗嚟同佢醫，點知華佗去咗中原，只係得徒弟喺度。哎，徒弟都好係啦，就請佢嚟睇嘞喎，華佗個徒弟同孫策睇咗傷，開咗藥佢話：箭頭係有毒嘅，啲毒呢已經入咗骨喇。將軍呢必須要安安靜靜噉休養一百日，噉先至能夠好得返㗎。如果一發火，畀怒氣衝擊，噉啲傷就好難醫得好㗎喇。孫策個為人啊就極其性急嘅，佢恨不得今日敷咗藥，聽朝就埋口好返晒。佢養傷休息咗二十幾日。呢一日，張紘就派咗個使者由許昌返嚟。孫策知道咗就叫佢嚟問下情況，嗰個使者話：曹操好怕主公你㗎，佢手下嘅謀士呢，亦都係非常敬服你嘅。唯有郭嘉一個人係唔服嘅唧。孫策就問佢：郭嘉佢點樣講啊？佢，誒，誒佢。你講。講！啊係係，誒。誒郭嘉佢對曹操話，佢話誒唔使怕主公你嘅。佢話主公你輕浮而冇準備，性情急躁又冇計謀，不過係匹夫之勇啫。第日，誒，第日必定死喺小人嘅手上嘅噉話。咩話？豈有此理！居然噉樣嚟睇小我，我發誓奪取你許昌！孫策佢都唔等啲傷好返啊，就要商量出兵嘞喎。張昭就勸佢話嘞：醫生囑咐落喇，要主公一百日之內唔能夠活動嘅。而家為咩事要因為一時嘅氣憤，就咁唔愛惜自己萬金之軀呢？正喺度講緊，有人嚟報告話袁紹派嚟嘅使者陳震到嘞。孫策就吩咐叫佢入嚟問佢。陳震就說明來意，話袁紹好想聯合東吳做外應，一齊去攻打曹操。孫策一聽，嘿！正中下懷啦！就係想去打曹操呢。佢十分歡喜，就喺當日，喺城樓上，請齊啲將官嚟，大排筵席款待陳震。飲飲下酒，哈奇怪噃，只見各位將官交頭接耳吱吱吟吟，然後就紛紛落樓。孫策莫名其妙啊問係咩嘢事啦。哈哈，究竟咩嘢事呢喂？係奇怪喎。

To hear audio for this text, and to learn the vocabulary sign up for a free LingQ account.

LingQでこのレッスンを開く

FMT_TIMED_TEXT:A9K2ucmb=12.58 openai.2024-10-31