يوم الكرامة
المذيعة ١: نرجع لأخبارنا الداخلية النهارده، المئات من حركات المعلمين المختلفة نظموا مظاهرة بعنوان يوم الكرامة علي سلالم نقابة الصحفيين.
كانوا بيحتجوا علي أوضاع المنظومة التعليمية، مش بس كده، لكن بيطالبوا كمان بإقالة دكتور محب الرافعي وزير التربية والتعليم.
المتظاهرين طلبوا برضه من ناحية تانية، إنه يتم إنهاء الحراسة علي نقابة المهن التعليمية، وضرورة إجراء انتخابات نزيهة.
ورفع أجور جميع العالمين بالتعليم تنفيذاً لوعد رئيس الجمهورية ليهم في فترة سابقة، وإعمالاً أيضاً لنصوص الدستور.
برضه كان حاضر في مشهد التظاهر رفض قانون الخدمة المدنية، صحيح القانون لا يطبق علي المعلمين لكن بيطبق علي الإداريين منهم.
فالناس اللي كانت بتتظاهر النهارده كانوا برضه رافضيين قانون الخدمة المدنية، وتطبيقه علي الإداريين في التعليم.
ده في الوقت اللي إنضمت للمظاهرة أعداد برضه من طلاب الثانوية العامة اللي كانوا في بعض منهم يعني بيتظاهر إمبارح علشان موضوع التنسيق.
معانا تقرير نتابع فيه اللي حصل النهارده في هذه المظاهرة.
المذيعة ٢ : علي سلم نقابة الصحفيين تظاهر المئات من المعلمين والطلاب للمطالبة بإقالة وزير التربية والتعليم فضلاً عن رفضهم لقانون الخدمة المدنية.
وطالب المتظاهرون براوتب لا تقل عن ثلاثة ألاف جنيه ولا تزيد عن عشرين ألف جنيه لرواتب المعلمين وهو ما تم كتابته في مسودة قانون تقدموا بيها للوزير السابق دون أية إستجابة.
المذيعة ١: معنا علي التليفون الأستاذ/ هاني كمال المتحدث بإسم وزارة التربية والتعليم. مساء الخير ياأستاذ هاني.
الضيف : مساء النور ياأستاذه لبني.
المذيعة: أهلاً وسهلأ بحضرتك.
إيه تعليق الوزارة أو إزاي الوزارة شايفة المظاهرات النهارده؟ وأزاي هتتعامل معاها، ومع المطالب اللي إترفعت؟
الضيف: الحقيقة طبعاً، التقرير اللي إتفضلت قناة الحياة وعرضتوه، بيحمل أكتر من حاجة، هرد عليهم سريعا.
المذيعة: إتفضل.
الضيف: فيما يخص السادة المعلمين، وتحديد مجموعة من المطالب، بنؤكد إن باب الوزارة مفتوح، وبالفعل الأسبوع الماضي التقي الدكتور محب الرافعي وزير التربية والتعليم الكثير من تيارات المعلمين المستقلة والنقابات.
ووزع علي كل واحد فيهم نسخة من مشروع تعديل قانون التعليم بما يعطي المعلم حقه وقدره.
قال لهم أنا معاكوا في أن المعلم يحصل علي أعلي راتب في الدولة ولكن هذا يتطلب تشريع .
على العموم، شكلوا لجنة منكوا علشان خاطر تقول إيه المطلوب تعديله على مشروع تعديل قانون التعليم وكيف يدرج قبل إعتماده من الجهة المختصة، هذا فيما يخص المطالب، والكل يعلم هذا.
أما فيما يخص قانون الخدمة المدنية، أعتقد أن وزير التربية والتعليم ليست طرفاً في هذا الأمر.
المذيعة ١: تمام شكراً جزيلاً نتابع نشوف الوضع يعني هيسفر عن ايه في الأيام اللي جاية شكراً أستاذ هاني كمال المتحدث بإسم وزارة التربية والتعليم.
