Bakaloria Year in Syria
البكالوريا هي آخر سنة دراسية بتكون بالثانوي، بتكون بالمدرسة الثانوية و بيقولولا سنة ال12، هي البكالوريا هي اللي بتحدد مصير الإنسان بعد ما تقدميها، بتقدميها بآخر الفحص يعني بآخر السنة ، بضلي تقريبا 12 شهر عم تدرسي مشان تقدمي بالأخير فحص هدا الفحص و هي العلامات هي اللي بتحدد انتي شو بدك تدخلي بعدين و شو بدو يصير بمستقبلك و شو رح تشتغلي امم ، هي تقريبا بتبلش بأخر سنة الحادي عشر لاخر سنة البكالوريا.
يعني الواحد بيبلش بالبكالوريا بيدرس مشان يلحق المنهاج لانو المنهاج كتير ضخم عنا كتير مواد و مواد كتير ضخمة و مواد بتكون حفظية أكتر مما انو تكون فهمي و تحلي يعني بالمعنى المثالي يعني انتي بتحفظي الحل المعادلة الرياضيات حفظ، ما بتفهميها ، و بتفهمي شلون بتحلي بعدين بتحلي عادي عليها. ممكن انو تحفظي المعادلة متل ما هي تحفظيها حفظ من دون ما تفهمي شو هي الطريقة الحل. حتى أنو في كتير عالم بيحفظوا المسائل أكتر مما يفهمو شلون بتنحل ، لانو بالاخير الاسئلة بدي تجي نفس السؤال ما أنو بيجيبو سؤال تاني ، انو بقولو الطالب فهمان و لا لا، خلص انو هو حافظ و لا لا. نفس الشي بالفيزياء، نفس الشي بالكيمياء، و بكل المواد ، فبالاخير انو البكالوريا هي عبارة عن حفظ اكتر مما تكون هي عبارة عن فهم، و هادا الشي كتير بكون صعب انو الواحد يحفظ اكتر من انو الواحد يفهم.
فلذلك الواحد بيبلش فورا بعد ما يخلص سنة الحادي عشر، بالصيف، بيبلش يدخل معاهد دورات رياضيات و فيزياء و كيمياء و علوم. مشان يلحق لاخرة السنة اللي هي الفحص بكون في حزيران.
هلا اول الشي بالصيف يمكن ما كتير تتأثر حياتو الاجتماعية لانو بكون الضغط لساتو قليل و بكون عم ياخد كميات قليلة يعني بكون متل دوام المدرسة العادي بس بكون كميات قليلة فبيقدر انو يطلع و يفوت مع رفقاتو يتسلى و هيك. بس الواحد وقت اللي بتصير حياتو الاجتماعية انو عنجد انقطعت هي بالفصل التاني، يعني حتى بالفصل الاول تبع البكالوريا، بيكون الواحد لسه مانو مستوعب، عم يداوم بالمدرسة و يتسلى و عندو أساتذة بالبيت و ممكن ما كتير يهتم باساتذة المدرسة.
بعدين نحنا طلاب البكالوريا منقطع تقريبا من الفصل التاني، يعني منبطل نداوم بالمدرسة بالفصل التاني أو حتى يمكن منداوم اسبوع أو اسبوعين ، بعدين انو خلص منضل بالبيت و منضل عم ندرس فكمية الاعطاء اللي بتكون بالفصل التاني ما حدا بياخدها بالمدرسة لانو بيكون عندو بالاصل اساتذة خصوصية فممكن كتير عالم انو ما يلحقو المدرسة و البييت انو يدرسلون و ما بيلحقو المنهاج، بيضطروا وقتها انو يقطعو و بيقطعوا بيضطروا انو يحطو استاذة خصوصية مشان يجو يفسرولون الاشياء اللي ما حضروها.
المنهاج كبير، فمايرح يلحقو انو يروحوا على المدرسة و يرجعو تعبانين و يرجعو يدرسو و يرجعو يخلصو الوظايف و بيكون في عندن اساتذة بالبيت. فما رح يقدروا يلحقو بين المدرسة و البيت و الاساتذة الخصوصية و المنهاج الضخم الكبير الي نحنا. فبيضطروا انو يقطعو المدرسة مشان يقدر يلحقو من وقتون و يدرسو بهدا الوقت يقدرو يدرسو لانو بالمدرسة بروحو كتير وقت. فيضل الولد قاعد بالبيت عم بيدرس و بالقوضة و بيهئولون الاهل كل الجو لحتى يقعد يدرس، يعني اذا بدو ياخد استراحة يمكن ياخد استراحة بقلب البيت احسنلو من انو يطلع.
