張悦楷講《三國演義》, 056

正當劉備打敗仗，處境十分淒涼危急嘅時候，糜芳受咗傷嚟到，又講咗個驚人消息，話趙子龍反水啊，去咗投降曹操喇噉。劉備就話佢嘞：亂講！子龍係我嘅老朋友，佢點會反水啊？張飛話：好難講噃，或者佢而家見到我哋勢窮力盡，冇乜希望喇，就走去投降曹操，貪圖富貴都有之嘅咋。子龍嚟跟從我嘅時候，我正係處在患難之中，佢對我嘅心呀，真係堅如鐵石。富貴係唔能夠動搖到佢㗎。糜芳就話喇：不過，我親眼睇住佢趯咗去西北方㗎。張飛撞火喇：哼！等我親自去搵佢，如果撞到佢，我將佢一槍㓤死！三弟三弟，你唔好咁暴躁，千祈唔好怪錯子龍啊！唉三弟啊，你仲記唔記得你二哥斬顏良誅文丑嘅事吖？子龍呢次走咗去，必定有原因嘅，子龍必定唔會捨棄我嘅。張飛真係炮仗頸直腸直肚，劉備點講佢都唔肯聽，帶咗二十幾個馬軍，一直追到去長坂坡。長坂坡呀，就喺而家湖北省當陽縣嘅東便。呢，今日啊，當陽縣仲係保存呢個古蹟㗎。噉啊長坂坡呢處有道橋就叫做長坂橋嘞。張飛見到橋嘅東便，有一大片樹林，哈哈佢諗到條計，點呢？佢命令嗰二十幾個馬軍啊，斬咗啲樹枝，將啲樹枝呢就綁喺馬尾上便。然後叫佢哋騎住馬，喺樹林裏便來來回回咁跑啊，哈，噉咪搞到一浸浸灰塵沖天而起咯。遠遠望見呢就好似呢處有好多人馬噉㗎喇。張飛佈落疑兵，就騎住馬，企正喺長坂橋上便。雙手打橫揸住嗰支丈八蛇矛，碌大雙眼望實西便。好喇，張飛喺呢處守住長坂橋就暫時唔講佢住，就要講下趙雲先。糜芳話趙雲就趯咗去西北方吖，噉究竟趙雲去咗邊呢？原來係噉嘅，趙雲啊，佢自從喺四更嘅時候，同曹軍打起上嚟殺來殺去，一直殺到天光，哈弊嘞！搵唔到劉備，連劉備嘅家眷都失咗。趙雲就諗啦：主公將兩位夫人同阿斗小主人托付畀我。今日，如果喺亂軍之中失散咗，我仲有乜嘢面目返去見主公呢？哼！我不如殺返入去決一死戰，點都要搵返主母同小主人嘅下落，走！趙雲招呼啲人馬跟住佢殺返轉頭。但係佢一睇，只係剩低三四十個馬軍咋。嘿，人少就人少啦，趙雲拍馬衝返入去亂軍之中，到處咁搵。唉，確係陰公咯，只聽見兩個縣啲百姓呀，嗰啲哭喊聲呼天搶地。嗰啲身上中咗箭嘅，捱咗槍嘅，簡直計都計唔掂咁多。啲老百姓呀，好多都顧唔掂自己嘅親人咯，掉低妻兒老小，拋男棄女，自己就逃命嘞。趙雲騎住馬，正在走走下，見到有個人瞓喺路邊啲草林處一睇，哦，原來係簡雍！簡雍就話喇：誒，誒，兩位主母，呀誒，掉低咗架車，抱住阿斗逃走。我啊快啲騎馬追住去啦，誒，轉過咗一個山坡。點知撞着一個曹軍嘅將官，畀佢㓤咗我一槍，跌咗落馬。匹馬呢，就畀佢哋搶咗去喇。我又冇辦法同佢打過，就唯有瞓喺呢處嚟喇，誒喲，誒呀。趙雲就叫跟住嚟嘅馬軍，讓出一匹馬畀簡雍騎，吩咐兩個兵卒，保護住佢去搵劉備。趙雲對簡雍話嘞，你見到主公就話佢知，我趙雲上天入地，點都要將主母同小主人搵返嚟！如果萬一搵唔到，我就死喺沙場之上啦！趙雲講完，一拍隻馬就向住長坂坡嗰便跑過去。喺半路，突然聽到有個人喺度嗌佢喎：趙將軍，趙將軍，你去邊處啊？趙雲即刻勒住馬：你係邊個？我，我係劉使君手下，護送車輛行李嘅兵士啊，畀箭射傷咗啊。趙雲就急急問佢兩位夫人嘅消息啦。嗰個兵士就話嘞：誒啱啱睇見甘夫人，披頭散髮，打大赤腳，誒，跟住一群百姓婦女，行咗去南便啊。趙雲一聽講，顧唔住嗰個傷兵嘞，拂噉一鞭隻馬，向住南便飛跑追過去。追到咁上下，見到有班百姓，男男女女總共有成幾百人嘅，你拖我我掹你噉一路逃命。趙雲大聲咁嗌啊：甘夫人喺唔喺裏便嚟啊？甘夫人喺唔喺裏便嚟啊？甘夫人真係喺呢處噃，佢喺後便嚟，一睇見趙雲，就放聲大哭啦。趙雲趕到上去，跳咗落馬插好支槍，佢都喊起上嚟話：唉呢啲都係我趙雲嘅過錯，使到主母失散受噉嘅苦楚。糜夫人同小主人而家喺邊處啊？甘夫人話：我同糜夫人，畀啲曹軍一路追，只有掉低架車同啲行李，混埋喺啲百姓裏便行路走啦。行行下，又撞到一支軍隊，畀佢哋沖散咗，噉就唔見咗糜夫人同小主人喇。我一個人跟住啲百姓一路逃命嚟到呢處。正喺度講緊，啲百姓忽然間含含聲吵起上嚟。喂呀！又見到一隊曹軍撞出嚟嘞。趙雲立即拔起支槍，飛身上馬準備打仗。佢一望，哈嗨，就喺面前，喺一匹馬嘅上便綁住一個人，乃係糜竺。佢後便呢就跟住一員將官，手提大刀帶領住千多名兵卒。原來呢個係曹仁部下嘅將官叫做淳于導啊，佢捉到糜竺啊正在解返去領功。嘿！趙雲大喝一聲，挺槍躍馬直取淳于導。打咗幾個回合，淳于導頂唔住嘞，畀趙雲一槍㓤咗佢落馬。趙雲喇喇聲上前救咗糜竺，又搶到兩匹馬添，就請甘夫人上馬就殺開條路，一直將佢哋護送到長坂坡嗰道橋處。一去到，只見張飛立馬橫矛，企喺橋中心。張飛大聲話：子龍，你點解要反我大哥？張將軍，我搵唔到主母同小主人，因此墮咗尾啫，點解話我反啊？我知道晒喇，如果唔係簡雍嚟報咗信先呀，我就唔肯過你！張將軍，主公喺邊度啊？就喺前便冇幾遠唧。趙雲就對糜竺話嘞：你保護甘夫人行先，等我繼續去搵糜夫人同小主人啦。講完，趙雲帶住幾名馬軍，跟住條舊路跑返轉頭。跑跑下，迎面遇着曹軍一個將官。佢手上提住一支鐵槍，背上孭住一把寶劍，帶住十幾個馬軍衝緊過嚟。趙雲問都唔問佢一句啊一直就殺過去，交手一個回合唧，一槍就將嗰個將官刺咗落馬下。跟住嚟嗰啲馬軍啊，㗾噉就逃跑晒啦。呢個將官係邊個呢？佢原來係跟住曹操身邊，同曹操孭劍嘅將官，叫做夏侯恩。曹操啊有兩把寶劍，一把叫做倚天劍，一把叫做青釭劍。曹操自己隨身就帶住倚天劍，呢把青釭劍呢，就交畀夏侯恩同佢帶住。呢把青釭劍呀，鋒利無比真係削鐵如泥㗎。呢個夏侯恩恃住自己有幾斤力喎，佢瞞住曹操，帶住一班人，出嚟到處咁搶嘢發橫財。點知一下就撞正趙雲，都唔夠兩下手腳，就畀趙雲攞咗大命嘞，噉就抵佢衰嘅啦係嘛。趙雲攞咗嗰把劍，仔細一睇，咦，劍把上便嵌住青釭兩個金字，噉先至知道原來係一把寶劍嚟。趙雲將寶劍插返好，掛喺身邊，提槍上馬再次殺入重圍嘞。佢呢個時候回過頭睇下，唉，一個隨從都冇喇。就係剩返自己單身一個。趙雲連半點縮沙嘅意思都冇啊，只係顧住四圍咁搵。但凡碰到百姓就打聽糜夫人嘅消息，問咗好多人嘞都話唔知。哈，收尾問到一個人，佢指住前便話：呢，夫人抱住個細佬哥，佢腳上啊，中咗一槍啊行唔逳，就坐喺前便埲牆邊咋。趙雲一聽講，得喇，話聲唔該就連忙趕過去。只見前便有間屋，都畀火燒壞晒㗎喇，糜夫人就抱住阿斗，坐喺牆腳一個乾咗嘅井旁邊喊緊。誒呀，搵到喇！趙雲睇見就立即落馬，行上去跪喺地行個禮。糜夫人話喇：我能夠見到將軍，阿斗就有命喇。將軍啊將軍，你要可憐佢父親，奔波飄蕩咗半世人，就係得呢點骨肉嘞。將軍，你保護住個細佬哥，等佢見到父親，噉，噉，噉我就係死咗個心都安樂咯。夫人啊，要你受難，都係我趙雲嘅過錯！唔好多講喇，請夫人上馬，我跟住行，我拼咗命都要保護夫人，衝出重圍！噉點得呢？將軍你冇馬得㗎。呢個細佬哥，全靠將軍你保護喇。我已經身受重傷，死咗亦冇乜嘢可惜。將軍呀快啲抱個細佬哥走啦！唔好因為我連累咗你啊。夫人，你聽下，喊殺嘅聲好近啊，追兵馬上就要嚟到，請夫人快啲上馬！將軍，我實在唔去得嘅呢，你快啲抱個細佬哥走，免得兩誤啊！糜夫人一便講，一便將阿斗遞畀趙雲。將軍個細佬哥條命，就全在將軍你身上啊！趙雲冇接阿斗，仲係三番四次請夫人上馬。糜夫人點都唔肯。呢個時候，四周圍嘅喊殺聲越嚟越近。趙雲啊急到不得了，佢大聲噉話：夫人啊，你唔聽我講，追兵一到你點算！糜夫人唔出聲，突然將阿斗擗低喺地，擰轉身一下就舂咗落個乾井裏便死咗。誒呀！夫人，夫人！趙雲見到糜夫人已經死咗嘞，佢怕曹兵知道，偷走個屍體，就出力噉將埲泥牆啊㧬冧咗，冚住個井。搞掂喇，就解開條勒甲腰帶，放低個護心鏡，將阿斗放喺胸前，扎好，用甲掩住，然後提槍上馬。嘿！真係險啊！趙雲啱啱裝好身，曹洪手下嘅一員將官晏明啊，手執三尖兩刃刀就帶住一隊步軍殺到嚟喇。趙雲迎上去，唔到三個回合，趙雲一槍就刺咗佢落馬。殺散啲曹兵，沖開條血路，策馬飛奔。趙雲跑跑下，又迎面遇着一支兵馬。當先一員大將，嗰支大旗上面寫住伶伶俐俐啊，河間張郃！趙雲一聲唔出，費事同佢搭話喇挺槍就打。打咗十幾個回合，趙雲唔敢打咁耐，虛晃一槍奪路就走。張郃唔肯放過佢，喺後便狂追啊。趙雲就猛鞭隻馬就跑到飛快。點知道跑跑下嗶哩嗶哩啪沙一聲，連人帶馬就碌咗落個大氹裏便。嗯你死喇！張郃衝到嚟，舉起支槍就要刺落去。忽然間，紅光一閃，嗰匹馬，喺個氹裏便平空一跳啪聲跳咗出嚟，嘿好彩數啊！呢，有詩為證啊：紅光罩體困龍飛，征馬沖開長坂圍。四十二年真命主，將軍因得顯神威。嘩！張郃見到嚇咗一驚，立即退兵走人。趙雲脫咗險，拍馬就跑喇。哈，喺後便又有兩個將官大聲嗌：趙雲你咪走啊！誒呀，弊！前便又有兩個將官，截住去路。後便追緊嚟嘅，係馬延、張顗，前便截路嘅呢係焦觸、張南。佢哋四個都係往日袁紹手下嘅將官，而家投降咗曹操。趙雲力戰四員大將毫無懼色。嗰啲曹兵一齊噉湧過嚟，趙雲𠻘聲掹出把青釭寶劍，隨手亂斬。手起劍落，鐵甲都斬開，啲鮮血呀啪啪聲咁噴。就係噉樣，佢殺退咗曹軍嗰班將官衝出咗重圍。呢個時候，曹操已經率領大軍嚟到。佢正在騎住馬，企喺景山上面觀戰。佢見到有個將軍，嘩嗨！乜咁犀利㗎，所到之處冇人頂得住啊。佢連忙問身邊嗰啲人呢個將軍叫做咩名啊噉。哈，啲人都唔知㗎噃。曹洪就飛馬落山大聲咁嗌：打緊嗰位將軍，請你留下姓名！我就係常山趙子龍！曹洪問明白喇，就返去報告曹操。曹操讚啊：啊，真係一員虎將！我一定要生擒佢！曹操立即派人四圍咁飛馬傳令：但凡趙雲去到嘅地方，唔准放冷戰，只係要捉生嘅。哈哈，正係因為曹操下咗呢個命令啊，趙雲噉先至走甩咗呢場大難。呢啲呢，亦係阿斗有福喇。呢一場大戰，趙雲懷抱住阿斗，喺重重包圍之中殺出嚟。佢總共斬倒兩面大旗；搶咗三條槊，即係長槍啊；前前後後，連槍刺劍斬，殺死咗曹軍有名嘅將官五十幾名。後嚟，有人寫咗首詩讚佢話：血染征袍透甲紅，當陽誰敢與爭鋒！古來沖陣扶危主，只有常山趙子龍。噉趙雲衝出重圍之後，走走下只見喺山坡下便，又撞出兩支軍隊。當先兩名將官，乃係夏侯惇嘅部將鍾縉、鍾紳兩兄弟。一個呢就使把大斧，一個使支畫戟，佢哋大聲噉喝：趙雲，你快快下馬受綁！趙雲都唔同佢哋講咁多啊，挺槍就刺。鍾縉啊首先衝上嚟，揮舞大斧，同趙雲交手。都唔到三個回合，畀趙雲手起一槍刺咗落馬。趙雲即刻搶路就走，哈，點知鍾紳揸住畫戟喺背後，死咁追住嚟噃。趙雲匹馬打咗咁耐仗又攰㗎啦，噉兩匹馬走走下呢，頭尾都碰埋一齊嘞。趙雲畀佢追到嘞，鍾紳嗰支戟呀，就係貼住趙雲個背梅嗰度喺度撩下撩下。趙雲猛然間，啪！撥轉馬頭，兩個人嘅心口拍心口。趙雲左手揸槍，隔開鍾紳支戟，右手掹出青釭寶劍，嘿！一劍斬過去，連頭帶鋼盔啊，咵噉斬開成邊，鍾紳就當堂冇命。嗰啲兵卒呀，㗾噉就趯散晒。趙雲噉先至走甩身，𠽤𠽤𡃈𠽤𠽤𡃈𠽤𠽤𡃈𠽤𠽤𡃈，一直向住長坂橋嗰便跑過去。跑跑下，只聽見後便殺啊殺啊嘅吶喊聲嘈到不得了。原來係大將文聘帶兵追緊嚟。趙雲跑到嚟橋邊，已經係人困馬乏。佢一眼望張飛，挺住長矛，騎住馬，企喺橋上，就大聲噉嗌：翼德快啲嚟幫我！子龍快啲走，啲追兵，等我嚟對付啦！𠽤𠽤𡃈𠽤𠽤𡃈𠽤𠽤𡃈𠽤𠽤𡃈𠽤𠽤𡃈。趙雲縱馬飛跑過橋，又行咗二十幾里，先至搵到劉備。當時劉備啊，同埋一班隨從就喺樖樹下便休息。趙雲嚟到，噼啪噉跳咗落馬，對住劉備跪喺地下嚟喊起上嚟。劉備嘅眼淚亦都忍唔住喇，啪啪聲咁流。趙雲氣喘喘噉話：我趙雲，實在罪該萬死。糜夫人身受重傷，佢無論如何都唔肯上馬，跳咗落個乾井裏便，死咗。我，我唯有推冧一埲泥牆，將個井𢫏住。然後我懷抱住公子殺出重圍，托賴主公你嘅洪福，好彩走甩返嚟。啱先，啱先公子仲喺我懷抱裏便喊，而家，而家唔聽見有咩動靜。大，大概，大概保唔住咯。趙雲喇喇聲解開衣甲，一睇，哈哈好在，原來阿斗瞓到淰淰仲未醒啫。哎呀，好彩啊！公子冇事啊！趙雲捧住阿斗雙手遞畀劉備。劉備接咗過嚟，一下就將阿斗掉低喺地。為咗你個衰仔，幾乎害咗我一員大將啊。趙雲連忙喺地下抱起阿斗，感動到又喊起上嚟。佢對住劉備叩頭話：主公啊！我趙雲就算係肝腦塗地，都唔能夠報答主公你嘅恩德啊！呢，仲有詩為證喎：曹操軍中飛虎出，趙雲懷內小龍眠。無由撫慰忠臣意，故把親兒擲馬前。好喇，而家返轉頭嚟講返下張飛。佢放趙雲過咗橋，冇幾耐，文聘帶兵追到嚟喇。咦，只見一員大將，騎住馬企喺橋上，嗰雙眼碌到大大，好似一對銅鈴噉，嗰棚老虎鬚條條棠篤企。雙手打橫揸住一支丈八蛇矛，威風凜凜，殺氣騰騰。文聘雖然係大將啊，都不禁窒咗一窒。佢望一望橋東嗰便，又見到樹林後便煙塵滾滾。嗯，一定係有伏兵喺度㗎。所以就更加唔敢前進嘞，就唯有勒住馬睇定下先。過咗一陣，曹仁、李典、夏侯惇、夏侯淵、樂進、張遼、張郃、許褚，佢哋成班大將都趕到嚟。佢哋見到張飛怒火沖天噉企喺橋上，亦都唔敢前進。佢哋嘅心諗：唔知係咪諸葛孔明嘅計嚟啫。事關領孔明嘢都領得多喇，都有啲膽戰心驚呀。曹軍啲將領將人馬喺橋邊一字噉擺開，都唔敢向前衝。之就噉企喺處唔逳都唔係路㗎，於是就派人去請曹操親自嚟。曹操聽講話有個噉嘅將軍擋路唄，即刻上馬，喺陣後飛快噉趕到前便嚟睇嘞喎。張飛喺橋上碌大雙眼。哦，隱隱約約望見曹軍嘅後隊，忽然出現咗青色嘅大羅傘，同埋一啲旄鉞旌旗啊噉。佢個心諗：實係請咗曹操親自出馬嚟喇。佢忍唔住大叫一聲話：我就係燕人張翼德，邊個有膽嚟同我拼個死活啊！張飛呢一聲嗌出嚟呀，嗰種威勢啊直情好似喺半天打咗個大雷。曹軍啲人馬聽見當堂嚇到嘀嘀震。曹操亦有啲心虛，急急叫人收起把青羅傘。佢對旁邊嗰班將領話：以前，我聽雲長講過，話張翼德喺百萬大軍之中，要斬個上將嘅人頭呀，簡直好似喺個袋處扲嘢咁容易嘅。今日遇着佢喇，大家千祈唔好大意啊。呢便曹操嘅說話仲未講完，嗰頭張飛瞪大雙眼又猛喝話：燕人張翼德在此，邊個敢嚟決一死戰啊！嘩！乜氣勢真係咁威㗎！曹操有啲想撤退嘞。張飛見到曹操後軍陣腳已經逳動嘞。哈，你班人究竟想點啊吓。於是佢挺一挺長矛，又試大聲噉喝：哈，打又唔打，退又唔退，你哋做乜嘢！張飛都未講完啊，曹操身邊有個軍官叫做夏侯傑，已經嚇到呀膽都破咗，喺馬背打倒椗舂咗落地當堂嗚呼哀哉。咦呀！曹操一勒轉馬頭，𠽤𡃈𠽤𡃈𠽤𡃈噉就猛咁跑。嘿，三軍統帥都走人嘞，唔走就笨啦。於是所有嘅軍官兵卒，一齊掉轉頭，向西便發狂咁跑。真係倒瀉籮蟹都冇咁熱鬧啊，一時間，丟盔棄甲，掉低刀槍嘅不計其數。嗨呀，人如潮湧啊馬似山崩，你踩我我踩你，就係噉樣互相踐踏，都唔知死咗幾多人。呢，有詩為證啊：長坂橋頭殺氣生，橫槍立馬眼圓睜。一聲好似轟雷震，獨退曹家百萬兵。曹操畀張飛個威勢嚇到佢失晒魂，佢拂拂拂咁搏命鞭隻馬。嘿，跑得最快係佢喇，嘿嘿，之最狼狽亦係佢。跑到呀頂帽啊跌咗啦，髮簪又甩晒啦，一支都冇剩，披頭散髮，嘿嘿，都唔似個丞相噉樣喇。張遼同許褚喺後便猛追上嚟，一手拉實曹操匹馬嘅馬籠頭，拉停咗佢。哎呀，曹操當時驚到呀，口又窒手又震，面都青晒。張遼話喇：丞相你唔使驚，諒佢張飛一個人，使乜咁怕佢吖！丞相你立即下令殺返轉頭啦，一定能夠捉到劉備嘅！聽張遼、許褚噉樣講啊，曹操個心先至稍為定返啲。但係佢都仲未敢立即下令殺返轉頭噃，只係叫張遼、許褚，再去長坂橋探聽下消息先。而家講下張飛，佢見到曹軍㗾噉退走晒，佢亦唔敢去追。急急就去嗌跟住佢嚟嗰二十幾個馬軍，叫佢哋將綁喺馬尾嘅樹枝啊解返低，又將道橋拆斷咗。然後就跑返去見劉備。又將嚇退咗曹軍，拆斷咗道橋嘅事講畀劉備聽。劉備聽咗就話喇：三弟，你勇敢，確實係夠勇敢嘞，可惜你諗錯咗吖。點解呢？曹操，好精㗎。你唔應該拆斷道橋㗎，佢一定會追嚟嘅。佢畀我一喝，退咗成幾里路，仲點敢嚟追啊？唉，你如果唔拆斷道橋，佢就怕有埋伏，就唔敢進兵。你而家將道橋拆斷咗，佢就一定會估到我哋係因為兵少心怯，就必定會嚟追㗎喇。三弟呀，佢有成百萬大軍咁多人。雖然長江漢水咁闊啊，佢叫人填咗佢都過得嚟吖，佢仲使怕你拆斷道橋咩？劉備立即吩咐起程，混小路走人。噉啊究竟劉備走唔走得甩，撇唔撇得開曹操呢？

FMT_TIMED_TEXT:A9K2ucmb=8.37 openai.2024-10-31