張悦楷講《三國演義》, 026

今日講下曹操啊，佢就決定先去東征呂布。謀士荀彧就建議話：噉誒要派個人去約一約劉備先，等佢回覆咗喇，然後先至好出兵。曹操採納咗佢嘅意見，就一方面發一封信去畀劉玄德，另一方面呢就稟奏皇帝，封袁紹做大將軍、太尉，兼都督冀、青、幽、並四州。重重噉賞賜咗袁紹嘅使者，叫佢帶一封密信返去畀袁紹。封信話：你即管去打公孫瓚啦，我一定相助嘅噉。袁紹得到呢封信就十分高興，立即進兵去打公孫瓚嘞。而家講下呂布，呂布喺徐州嚟。哈每逢佢請親賓客，舉行宴會嘅時候呢，喺酒席之上啊，陳珪兩父子就必定盛讚呂布嘅恩德，真係就好話講到盡嘞。陳宮見到噉樣就唔高興嘞。有一日，佢實在忍唔住，就搵個機會同呂布話：陳珪兩父子成日噉當面恭維奉承將軍你，個心都唔知諗乜嘢，認真要提防佢哋至好啊。呂布發火嘞：呸！你無緣無故喺度講人壞話，想陷害好人呀你？陳宮唯有行開啦，佢一出咗門口就話喇唉！忠言聽唔入耳，我哋實要遭殃係咯，唉！陳宮就好想離開呂布走人去第處，但係個心又唔忍。同時呢，又怕畀人哋譏諷畀人哋笑。所以呢一排佢硬係成日都悶悶不樂。有一日，佢帶埋幾個人騎馬去小沛周圍嘅地面打獵解悶，吖，忽然見到官道上有一騎驛馬飛奔前去。誒驛馬即係為公家傳遞文書所使用嘅馬匹，呢處呢即係指騎馬去送公文嘅差人嘞。陳宮就好懷疑，唔打獵嘞，帶住嗰幾個隨從騎馬混小路去追。追到就問嗰個人，係邊處嘅，送乜嘢信，噉。嗰個使者知道來人實係呂布部下嘅人，就驚到唔識得點講好喎。陳宮叫人搜佢身，搜到劉備回覆曹操嘅密信一封。好啊！陳宮立即連人帶信，拉咗去見呂布。呂布就問咩事啦。嗰個使者話：曹丞相派我去劉豫州處送信，而家攞咗覆信，帶返去畀曹丞相，誒唔知道封信裏便講乜嘢㗎。呂布打開封信一睇，原來封信嘅大意係噉講嘅：知道丞相想攻打呂布，我一定盡心盡力，但係因為兵微將寡唔敢亂逳。只要丞相大兵一到，我願意去打頭陣。我而家作好一切準備，專等丞相你嘅命令等等。呂布睇完：哎吖，呸！曹操奸賊！你居然噉樣做法！即刻叫人拉咗個使者出去殺咗佢。跟住，呂布派陳宮去聯絡泰山賊寇孫觀、吳敦、尹禮、昌豨佢哋四個人，叫佢哋向東便進攻，攻打山東兗州各個郡。又命令高順、張遼去打沛城，進攻劉備。命令宋憲、魏續向兩便進兵，攻打汝陰、潁上。呂布自己呢就統領中軍，救應三路軍馬。好嘞，而家講下高順佢哋帶兵離開咗徐州，就到小沛。劉備一接到消息，就急急同大家商量啦。孫乾話：我們要快啲向曹操告急至得喇。劉備話嘞：係呀！邊個可以去許都告急呢吓？只見有個人應聲而出話：我去啦。劉備一睇，原來係自己嘅同鄉，姓簡，名雍，字憲和，而家喺度做幕賓，即係做參謀文書等等之類嘅工作嘅。好吖。劉備即刻寫咗封信交畀簡雍，叫佢日夜兼程送去許都求救。同時呢，馬上準備好守城嘅器具。噉啊守城嘅人力安排係噉嘅：劉備自己守南門，孫乾守北門，關公守西門，張飛守東門，就叫糜竺同佢個細佬糜芳呢就守護中軍。原來糜竺有個妹，嫁咗畀劉備做次妻嘅。劉備就同佢哋兩兄弟有郎舅之親，所以就叫佢哋守護中軍，保護妻兒老小。當高順嘅軍隊嚟到嘅時候，劉備喺城樓上面就問佢話嘞：我同奉先無仇無怨，點解要帶兵嚟打我呢？高順話嘞：你勾結曹操，想害我主公，而家事情敗露嘞，快啲投降就綁啦！講完就馬上指揮軍隊攻城。劉備緊閉城門，堅守不出。第日，張遼就帶兵嚟攻打西門。關公喺城上對佢話：張公你儀表非俗，點解失身於賊呢？張遼畀關公一句說話，講到耷低頭冇聲出。關公知道張遼此人啊，有忠義之氣，所以亦冇講啲難聽嘅說話嚟鬧佢，亦唔出戰。噉跟住張遼就帶兵退到去東門嘞。東門係張飛把手嘅，老虎蟹都出去打過啊，嘿，就開門出嚟迎戰嘞喎。呢件事，早就有人飛跑去報告關公。關公喇喇聲趕到去東門睇下，只見張飛剛剛出咗城唧，張遼已經帶住人馬退走咗嘞。張飛仲想去追啊，關公即刻叫佢返入城。張飛仲係聽二哥話嘅，返到入城，張飛就問：佢都驚咗我，撤退嘞，你點解唔畀我去追佢啊？關公話：此人嘅武藝，不在你我之下㗎。皆因剛才我用道理嚟點醒佢，睇嚟係有啲悔過嘅意思，所以佢就唔同我哋打唧。哦，原來噉嘅。張飛明喇，佢亦都命令士兵一於堅守城門，唔出去打喇。而家講下簡雍，佢就奉咗劉備之命去到許都見曹操。將呂布攻打小沛形勢危急，要請求救助嘅事講咗，又將劉備嘅書信交咗畀曹操。曹操啊即刻召集佢嗰班謀士嚟商量啦，佢話：如果我去攻打呂布呢，我啊唔憂袁紹牽制我嘅。就係怕劉表、張繡襲擊我嘅後方唧。荀攸話：佢哋兩個啱啱打敗咗，唔敢亂逳嘅。呂布係僥勇善戰，如果佢連結埋袁術，縱橫於淮、泗地區，噉急切之間想打趴佢都好難㗎。郭嘉跟住話嘞：而家趁住佢剛剛作反，人心都未曾歸附佢嘅時候，快啲去打佢就啱嘞。曹操同意佢哋嘅意見，就命令夏侯惇同埋夏侯淵、呂虔、李典帶五萬兵馬行先。佢自己就率領大軍隨後出發，簡雍就跟埋佢一齊。呢個消息，有探馬報咗畀高順知，高順就飛快報告呂布。咩話？曹操帶兵嚟救劉備咩？唔係小事喎。呂布首先命令侯成、郝萌、曹性帶二百幾個馬軍去接應高順，叫佢哋離開沛城卅里嘅地方去迎擊曹軍，佢自己就帶領大軍隨後接應。好喇，劉備喺小沛城內，見到高順撤退，知道係曹操兵到喇。於是淨係留低孫乾喺度守城，糜竺、糜芳看家，自己就同埋關公、張飛兩個，點齊兵馬出去城外，分頭扎好營寨嚟接應曹軍。而家講下夏侯惇，佢帶兵一路前進，就正好同高順嘅部隊相遇，當堂打起上嚟。兩馬相交，打咗四五十個回合，高順唔係手腳啊，敗陣而走。夏侯惇就拍馬猛追。高順呢繞住陣嚟走，夏侯惇就點都唔放過佢，亦繞住陣嚟追佢噃。喺陣上，曹性啊睺到實，暗中拈弓搭箭瞄準喇。一箭射過去，正正射中夏侯惇只左眼。哎呀！夏侯惇大叫一聲，誒！立刻用隻手掹咗支箭。點知連眼珠都一齊掹咗出嚟，夏侯惇大叫話：父精母血，唔好嘥咗佢啊！一口就將粒眼珠食咗落肚。跟住挺槍縱馬直取曹性。曹性當時都畀夏侯惇嘅行動嚇到傻晒，衝到埋嚟嘞，都仲唔識逳喎，畀夏侯惇一槍插正面門，當堂死於馬下。噉兩面嘅軍士見到噉嘅場面啊，個個都驚晒。夏侯惇殺咗曹性，就縱馬回陣。高順就乘機喺背後指揮軍隊追住衝過嚟，打到曹兵大敗。夏侯淵呢就保護住佢大佬，急急走人。呂虔、李典呢，就帶住敗兵，一直撤退去到濟北先至安營。高順得勝嘞，就帶兵回轉頭嚟攻打劉備嘞噃。咁啱呂布個大軍亦到嘞。呂布就同張遼、高順分兵三路，去進攻劉、關、張三個營寨。當時係噉嘅，高順帶住張遼去攻擊關公營寨，呂布自己去攻擊張飛營寨。關公、張飛各自出嚟迎戰啦。劉備帶兵兩頭接應。哈，點知呂布呀，分出一部分兵力，喺後便殺過嚟。將關公、張飛兩支人馬都打到潰散晒。劉備呢，亦打到剩返幾十個馬軍就搏命跑返去沛城。呂布咬到實一實，一路窮追不捨。劉備啊趯到城下，大嗌城上嘅軍士放吊橋落嚟畀佢過啦。呢個時候，呂布已經追到嚟嘞。城上啲軍士本來想放箭又唔敢喎，事關怕連劉備都射埋㗎嘛。所以畀呂布呀趁勢殺咗入城內。守門嘅將士抵敵唔住，攬住個頭就走晒。呂布一佔住城門口，即刻叫大軍入城。劉備眼睇住形勢緊急，已經冇時間返屋企嘞，只有連妻兒老小都掉低唔要喇，穿城而過，直出西門，單人匹馬就逃難嘞。呂布一直趕到去劉備嘅住宅，糜竺出嚟迎接，佢對呂布話嘞：歷來都有話：大丈夫，係唔害人家嘅妻子。當前同將軍你爭天下嘅係曹操唧，玄德時時都記住轅門射戟嘅恩情，唔敢背叛將軍你嘅。而家萬不得已咯，先至去投奔曹操個啫，請將軍你憐憫下啦。呂布話：我同玄德係老朋友喇，我點會忍心害佢個家人呢？於是就叫糜竺帶埋劉備嘅一家大小去徐州安置。噉呂布呢，自己帶住人馬去山東兗州，留低高順、張遼就守衛小沛。呢個時候，孫乾已經逃出咗城外。關羽、張飛佢哋兩個打散咗，亦各自收集返一啲人馬，趯咗入去山裏便駐扎。而家講下劉備，佢單人匹馬逃難。行行下，後便有個人追到嚟，一睇，原來係孫乾。劉備話：唉，而家我兩個細佬不知生死，家人又失散咗，唉，都唔知點算好嘞。孫乾話：不如去投奔曹操再作打算呢。唉，唯有係噉啦。劉備同埋孫乾就混小路去許都，喺途中絕晒糧，冇嘢食，就走去啲村莊求人哋攞啲飯食嘞喎。哈，確係唔同嘅。但凡佢哋所到之處啊，一聽聞話係劉豫州嚟到，都搶住送飲食嚟。有一日，嚟到一家投宿。噉啊有個少年出嚟歡迎佢哋，問佢名，原來係個獵戶叫做劉安。劉安見到係豫州牧劉備嚟到唄，想搵啲野味嚟招待佢。但係一時之間又冇啊。唉，你哋估點吖嗱？劉安啊，竟然殺咗個老婆，割啲肉嚟煮畀劉備食啊！劉備啊飢腸轆轆，餓到乜嘢噉。食起上嚟都唔知幾滋味，就問嘞：呢啲係乜嘢肉啊？劉安話：誒，呢啲係，係狼肉啫。劉備一啲都冇思疑，飽飽噉食咗一大餐。當晚就喺度瞓。第二朝早起咗身準備走嘞，去後院牽馬。誒？不得了！喺廚房有個女人死屍嘅。一睇係殺死嘅，手臂上面嘅肉都割咗出嚟。劉備大吃一驚，就搵劉安問究竟係乜嘢事啦。劉安冇辦法嘞，唯有講畀劉備聽。噉劉備先至知道原來尋晚所食嘅，係劉安老婆啲肉啊！唉！劉備就傷心到極。之冇辦法啦，人死不能復生咯。就流住眼淚上馬。劉安話喇：小人，本來好想跟隨使君嘅，無奈老母在堂，無人侍奉，所以就唔敢離開咯。一路多多保重啊！劉備再三多謝佢，同佢分別咗就一路去梁城。行行下，見到煙塵滾滾遮天蔽日，一彪軍馬嚟到嘞。劉備知道呢一支就係曹操軍隊，就同孫乾一直去到中軍嘅大旗之下，搵到曹操見咗面喇，行過禮。劉備就將失咗沛城，同兩個細佬失散咗，連一家大細都唔見埋等等嘅事，詳詳細細噉講晒畀曹操聽。哎呀！曹操聽完呀，亦都戥劉備難過，佢都流出眼淚啊。收尾，劉備又將劉安殺咗老婆，割啲肉出嚟煮畀佢食嘅事講畀曹操聽。曹操好感動，即刻就叫孫乾攞咗一百兩黃金去賜畀劉安。噉啊當曹操個大軍嚟到濟北嘅時候，夏侯淵等一班大將，迎接咗曹操入去營寨。將佢兄長夏侯惇作戰負傷，盲咗隻眼，而家仲養緊傷嘅事一五一十講畀曹操聽。曹操聽咗，直情去到夏侯惇住嘅帳篷探望佢，又叫佢返去許都先，好好調理。然後，曹操就派人去探聽清楚，究竟呂布而家喺邊處嚟。過咗幾日，探馬返嚟報告話：呂布同陳宮、臧霸，聯合埋泰山郡嘅賊寇，一齊去咗進攻兗州各個郡喇噉。曹操即刻命令曹仁，帶三千兵去打沛城。自己就親自率領大軍，同埋劉備去打呂布嘞。當曹操嘅軍馬嚟到山東地面，接近蕭關嘅時候，就遇正泰山賊寇孫觀、吳敦、尹禮、昌豨呢四個人。佢哋帶住三萬幾兵就攔住去路。曹操叫許褚出戰。嗰四名賊將啊一齊出馬，四打一。許褚奮力死戰，打到嗰四名賊將呀只有招架之功，就並無還手之力。打得幾打，頂唔住嘞就各自逃跑。曹操趁勢掩殺過去，一直追到去蕭關。呢個消息，探馬早就飛快噉趯咗去報告畀呂布知嘞。當時呂布啊，已經返咗去徐州。佢係要同陳登去救小沛，就留低陳珪喺度守衛徐州。陳登臨出發嗰陣，佢父親陳珪對佢話：往日曹公曾經講過，東方嘅事情，冚𠾴唥交帶畀你嘞。而家，呂布就要失敗㗎喇，一有機會你就辦妥佢啦。陳登話嘞：外便嘅事孩兒會做㗎嘞。第日，如果呂布失敗，趯返嚟，父親你就請埋糜竺一齊守城，唔好放呂布入城。到時，孩兒自然有脫身嘅辦法嘅。哦，誒不過呂布嘅家人都喺齊處，心腹唔少，噉點做好呢？呢一層，孩兒亦有辦法嘞。噉陳登同佢父親傾完，就去見呂布話：主公呀，徐州係四面受敵，曹操必定全力嚟進攻嘅，噉我哋應當先諗好退路啊。我認為，應該將錢財糧食，全部移去下邳。將來一旦徐州被圍，下邳就有糧用啦。主公，仲係及早籌謀好噃。你講得啱啊，我啲家人妻子都一齊搬去好嘞。於是呂布就命令宋憲、魏續，保護佢嘅家人同埋錢財糧食搬去下邳。同時呢，自己帶埋陳登率領軍馬去救蕭關。行到半路，陳登就對呂布話：等我行先一步去蕭關探聽一下曹操嘅虛實先，然後主公你先至好嚟啊。好啊，你去啦。於是陳登就趕去蕭關先嘞喎。佢入咗關，見到陳宮佢哋陳登就話嘞：溫侯對你哋唔肯努力作戰十分不滿啊，而家要嚟責罰你哋噃。陳宮話：曹兵非常強大，唔能夠輕敵啊。我哋喺呢度嚴守關隘，你就返去勸主公力保沛城，呢個先至係上策啊。噉，好啦好啦。陳登係噉意應咗佢。到咗夜晚喇，陳登上去關上面望下，見到曹兵已經直逼關下喇，就漏夜連氣寫咗三封信，放喺箭上面射咗落關。第日，陳登扯嘞，佢飛馬返去見呂布話：關上便孫觀嗰班人呀，個個都想獻關投降啊。我已經留低陳宮喺度把手嘞，將軍，你喺今日黃昏嘅時候殺去救應啦。呂布話：哎呀！如果唔係你去一趟呀，呢座關就冇嘞。於是呂布叫陳登即刻飛馬返去蕭關，約定陳宮做內應，舉火為號噉。好喇，陳登去到蕭關，就走去同陳宮話嘞：弊喇！曹兵已經抄小路到咗關內喇，恐怕徐州有危險，你哋快啲返去啦。陳宮信晒陳登嘅說話，喇喇聲帶齊人馬，放棄蕭關走人咯喎。陳登呢就喺關上面放起火嚟。當時天色已經黑嘞，呂布個軍隊啱啱殺到，黑麻麻就同陳宮撤退嘅軍隊撞到正。呂布以為陳宮佢哋係曹兵，陳宮呢又以為呂布嘅軍隊係曹兵，於是乎就自相廝殺起上嚟。而曹操嘅兵馬呢，望見號火一起，就一齊殺到乘機猛攻。孫觀佢哋幾個嘢早就四散逃跑咯。呂布一直殺到天光，嘿！乜打咗成晚係自己人打自己人呀！呢個時候，先至知道原來中咗計。急急同陳宮返去徐州，點知返到城邊叫門嗰陣，城頭上便亂箭噉射落嚟。只見糜竺喺城樓上面大聲噉話：你搶咗我主公嘅城池，而家應該還返畀我主公喇！你唔能夠再入呢座城喇！呂布發火喇：陳珪喺邊處啊！陳珪喺邊處！我已經殺咗佢咯。呂布擰轉頭問陳宮：陳登喺度嘛？陳宮話喇：將軍啊！乜你仲執迷不悟，仲問嗰個奸賊做乜嘢吖！嗯啊！你哋快啲同我去搵到佢嚟！呂布叫人喺軍內到時咁搵陳登，搵極都搵唔到。陳宮就勸呂布快啲去小沛，呂布聽佢話就去。行到半路，只見一彪軍馬忽然間嚟到，一睇，原來係高順同張遼。呂布問佢哋嚟乜嘢事啦。高順話：陳登嚟報告話主公你被圍，叫我哋快啲嚟救你啊。陳宮話喇：又係呢個奸賊嘅詭計！呂布嬲到不得了啊，嘿！我一定要殺咗呢個奸賊！人嚟！傳令三軍，趕去小沛！呂布率領部隊，快馬趕到去小沛。咦？乜小沛嘅城上，冚𠾴唥插滿晒曹兵嘅旗幟㗎？哦！原來曹操已經命令曹仁偷襲咗城池，佈置好人馬喺度守衛添咯。呂布嬲到爆啊，喺城下大罵陳登。陳登喺城樓上指住呂布話：呵呵，我係漢朝嘅臣，跟你個反賊都得嘅咩？咪發夢喇你！哎呀！氣死我啊！呂布正話要攻城，忽然間聽見後便吶喊聲嘈起上嚟，跟住見到一隊人馬衝到嚟面前嘞。當時一員大將乃係張飛。高順出馬嚟迎戰，佢打張飛唔過，呂布親自接住同張飛打。戟來槍去，正喺度打得激烈嘅時候，陣外又聽見吶喊連天嘞。嘩！原來係曹操親自統率大軍，衝殺到嚟啊！呂布諗落，好難抵敵㗎喇，就帶兵向住東走，曹兵就跟住尾猛追。呂布啊趯到人困馬乏。忽然間又撞正一彪軍馬攔住去路，為首一員大將，立馬橫刀大聲噉喝：呂布咪走！關雲長在此啊！呂布舞起支戟，慌忙上前嚟接戰 . 點知道張飛已經喺後便追到嚟嘞 . 呂布無心戀戰咯，同陳宮佢哋殺開條血路，一直奔到去下邳 . 侯成帶兵嚟接咗佢入城，而家呢就暫時唔講佢住 . 而家講下關羽同張飛，佢哋好意外噉，喺截擊呂布個戰鬥裏便重逢 . 哎，大家都流起眼淚上嚟，互相講起失敗之後嘅情況 . 關羽話：我喺海州路上駐扎，知道咗消息，所以就嚟喇 . 張飛話：我呀一直喺芒碭山住到而家 . 今日能夠見返二哥，真係好彩啊！兩兄弟傾完幾句，一齊帶兵嚟到拜見劉備大哥，兩個都喊住跪喺地下。唉！劉備呀真係悲喜交集啊。跟住劉備帶佢哋兩個人去見曹操，然後呢就跟隨曹操進入徐州嘞。糜竺一見到劉備就講畀佢聽，話家眷呀個個平安啊噉。劉備就高興喇呢趟。陳珪、陳登兩父子呢，亦嚟參見曹操。呢一日，曹操大排筵席，舉行盛大嘅宴會，慰勞各位將領。曹操居中坐落，叫陳珪坐喺右便，劉備就坐喺左便，其餘嘅將士呀各個依照次序入席。宴會完畢之後，曹操為咗嘉獎陳珪父子嘅功勞，加封佢十個縣嘅俸祿。即係將十個縣嘅稅收作為加畀佢嘅薪水。啊嗨，噉就好多㗎喇吓。就封陳登啊做伏波將軍。曹操得咗徐州之後，個心十分歡喜，又同啲謀士商量起兵去進攻下邳。程昱話：而家呂布只係剩返下邳一個城嘞。如果逼得佢緊過頭，佢就必定係搏命打，然後去投奔袁術㗎嘞。一旦呂布同袁術聯合起嚟，佢哋嘅勢力就大大加強，要攻佢就難咯。所以主公要安排一個有本事嘅人，守住淮南徑路，內防呂布就外擋袁術。況且山東地區，仲有臧霸、孫觀呢一幫人未曾歸順，一定要提防佢哋至好啊，千祈唔好忽視啊。曹操話：我自己負責山東各路，淮南徑路就請玄德負責啦。劉備話：謹遵丞相將令！第日，劉備啊留低糜竺、簡雍喺徐州，自己帶住孫乾、關羽、張飛，率領部隊去守淮南徑路嘞。曹操呢，就親自帶兵去攻打下邳。

FMT_TIMED_TEXT:A9K2ucmb=12.81 openai.2024-10-31