淥 麪
「 又 搞 咗 成日 …… 」 我 望 咗 望 手機 , 又 試 搞 到 凌晨 , 已經 係 兩點 幾 。 出 到 公司 門口 , 咁啱 有 架 的士 , 我 嗱嗱 聲 截車 返 屋企 。
我 租 咗 九龍城 嘅 一 間 劏房 。 我 本身 同 父母 一齊 住 元朗 , 但 揾 到 依家 份 工 之後 , 就 搬 咗 出嚟 住 。 揀 九龍城 , 係 因為 方便 返工 : 我 依家 喺 九龍灣 做 緊 一 間 電視台 嘅 助導 。 「 助導 」 全名 係 助理 導演 , 即係 導演 嘅 助手 , 但 實際上 只 係 一 個 打雜 : 拍 節目 嗰陣 , 現場 所有 嘅 嘢 都 關 我 事 , 導演 、 演員 、 攝影師 …… 所有 人 問 嘅 問題 , 我 冚唪唥 都 要 識 答 。 我 連 大家 每 日 食 邊 間 餐廳 嘅 乜嘢 飯盒 都 要 顧 埋 一 份 。
我 間 劏房 喺 一 棟 舊樓 嘅 七 樓 , 租金 唔 貴 , 對 我 嘅 經濟 負擔 唔 算 大 。 而且 好彩 嗰度 有 𨋢 , 唔使 我 行 樓梯 。 不過 凌晨 一 個 人 返 屋企 都 有 少少 恐怖 , 所以 我 全程 都 會 戴 耳機 聽歌 。 今晚 我 返 到 屋企 都 已經 三點 零 , 入 門口 嗰 下 個 肚 響 咗 一 響 。 「 唉 , 肚餓 添 …… 」 做 電視台 嘅 人 個個 都 食無定時 , 我 上 一 餐 係 夜晚 八點 , 求求其其 食咗 盒 燒鴨飯 。
我 打開 櫥櫃 , 入面 放 咗 十幾 包 公仔麪 , 全部 都 係 辣味 。 我 好 少 煮飯 食 , 屋企 連 電飯煲 都 冇 , 淨係 得 一 個 電磁爐 同 一 個 電熱水壺 。 平時 我 肚餓 都 係 淥 麪 食 就算 , 但 當 我 返 完 十幾 個 鐘頭 工 : 「 唔想 淥麪 …… 好 麻煩 。 」 於是 我 閂 返 櫃門 , 開 另 一 個 櫃桶 , 拎 咗 杯 辣味 杯麪 出嚟 放 上 枱 —— 我 屋企 除咗 一 包包 公仔麪 之外 , 就 淨 返 一 杯 杯 杯麪 。 我 開 住 電熱水壺 就 撻 上 床 ( 我 張 床 就 喺正 我 張 枱 隔籬 ) 。
「 叮 ! 」 啲 水 一 煲 滾 , 我 就 爬 起身 坐 近 張 枱 , 搣 開 杯麪 個 蓋 , 斟 啲 滾水 落去 。 「 計時 三 分鐘 …… 」 我 開 着 手機 , 揾 返 我 最 鍾意 嗰 首 日文歌 出嚟 播 , 首 歌 唱 完 啱啱好 三 分鐘 , 於是 我 再 攤 返 上 床 聽 住 等 。 佢 第一 句 歌詞 就 係 : 「 你 淥 緊 杯麪 , 你 斟 緊 滾水 落去 …… 」
「 吖 ! 吖 ! 吖 ! 」 窗口 出面 有 一 樖 好 高 嘅 樹 , 夏天 朝早 一定 有 雀仔 喺 上面 叫 , 仲要 叫 得 好 難聽 。 「 嘈 夠 未 啊 …… 使唔使 朝朝 七點 都 準時 嘈 醒 我 —— 」 七點 ? 我 即時 爬 起 身 , 捽 一 捽 眼 , 望 一 望 出面 —— 個 天 已經 光 晒 。 「 大鑊 …… 」 我 杯 杯麪 已經 浸 咗 幾 個 鐘 , 杯身 摸 落 仲 有 少少 暖 , 但 啲 麪 已經 浸 到 腍 晒 , 成 擗 漿糊 噉 好 核突 ……
「 …… 都係 落 樓下 買 個 早餐 食 算 啦 …… 」