立即開始學習本課

張悦楷講《三國演義》, 098

龐德啊，佢同關雲長打咗五廿幾個回合，撥轉馬頭拖刀就走。關雲長以為佢用拖刀計啫，使怕你咩咪追上去咯。哈哈，龐德就冇咁簡單呢。原來佢呢個拖刀姿勢係虛嘅，佢將把刀喺馬鞍上面掛住，靜靜攞出張弓，一搭上箭腰一扭𠻘噉就射過嚟。關平啊幾醒目，佢眼快啊，見到龐德拉弓就大聲嗌嘞：賊將你咪放冷箭啊！關雲長就到底係老喇，佢睇得嚟呀支箭已經到步嘞，閃都閃唔切，哎呀！射中隻左臂。哈哈，關公一世都未試過咁蝕抵嘅，今日係第一勻啫吓。關平就快馬趕到救返父親回營。龐德見射中關雲長咯，即刻勒轉馬，舞起大刀正要縱馬追過去。忽然間，聽到本陣打鑼打到砰砰聲就震天響。龐德怕後軍有事喎，唯有急忙勒馬返轉頭啦。為咩事呢喂？唉，原來于禁啊，見龐德射中咗關雲長，咦，噉畀佢立個大功，佢咪好似瓦簷獅子叻到抆？噉我于禁仲有咩嘢威風啊？唔得，於是打鑼收兵。龐德返到嚟就問嘞：因咩事打鑼啊？于禁話喇：魏王告誡過我哋話關公智勇雙全，佢雖然中咗箭啊，就怕佢有乜嘢詭計啊，所以就打鑼收兵，叫將軍你回營啫。嘿，如果唔收兵，我已經斬咗佢喇！龐將軍呀，緊行無好步啊，慢慢嚟，慢慢嚟啦。龐德啊點都唔知道于禁會搞鬼㗎嘛，佢個心一味唔抵就係啦。關雲長回營之後，將箭頭掹咗出嚟，哎呀好彩，支箭呢就射得唔係幾深，敷咗啲金瘡藥呢就冇乜事嘞。關雲長痛恨龐德到極喇，佢同大家話喇：我誓要報呢一箭之仇啊！將軍暫時休息幾日先，然後再打都未遲吖。到咗第朝早，龐德帶兵嚟嘍打喇。關雲長即刻就要出馬，大家梗係勸住佢啦。龐德吩咐啲兵仔啊，猛咁用啲污言爛語嚟鬧。關平守住隘口，吩咐大家千祈唔好講畀關雲長知吓。如是者連氣十幾日，龐德啊日日嚟罵戰，就冇人出嚟迎戰。噉龐德就同于禁商量話喇：眼見得關雲長箭傷發作，唔能夠逳動。不如趁呢個大好機會，我哋率領全部七支軍隊，一擁殺入敵營，噉樊城就可以解圍喇。唔好啊唔好啊！于禁個心硬係怕龐德立大功。噉啊最好啦，曹操講過幾句啊不可輕敵啊，可打則打，不可打則守啊噉嘅說話，噉啊攞出嚟做聖旨，頂住龐德啊最啱使㗎啦嘛，噉啊幾大都唔應承出兵。龐德好幾次建議出兵攻打，于禁就次次都唔肯。佢仲將七支軍隊啊，轉移去咗山口，喺離開樊城十里遠嘅地方呢，挨住山邊，扎落營寨。于禁啊親自帶住一支軍隊，截斷條大路，命令龐德將人馬駐扎喺山谷裏頭。呵呵，噉樣布防法呀，龐德你仲點能夠進兵去立功啊。過咗一段時間，關雲長嘅箭傷埋咗口，關平好歡喜啦。呢一日，關平聽到于禁將七支軍隊都轉移去咗樊城北便安營，吖，唔知佢想出啲乜嘢術噃，就報畀阿爹知。關雲長聽講話有件噉事咩？就帶住幾個人，騎馬上去山崗觀察下。噉啊先望下樊城嗰頭，見到樊城上便，啲旗呀插到歪零歪稱都冇人理，啲兵卒就慌慌張張忙忙亂亂。又望下城北十里之外嘅山谷裏頭，駐扎住人馬。再一望，嗯只見襄江水漲，水流好急。觀察咗一輪，就問個嚮導官話：樊城北便十里嘅山谷，地名叫做乜嘢啊？叫做罾口川啊。罾口川？哈哈哈哈哈哈哈哈哈哈哈哈。關平問嘞：阿爹點解咁好笑啊？哈哈哈哈，于禁呢趟實畀我捉住喇。阿爹你點知㗎？魚入罾口，仲有幾長命吖？啊？哈哈哈哈哈哈哈哈哈哈。哦噉即係話好快就可以消滅曹軍七支人馬咯喎。係咪㗎？唔止關平啊大家都唔信噃。當時係秋天八月，秋林夜雨就連氣灑咗幾日。關雲長叫人準備船隻，斬樹做木排，整定啲竹篙啊船槳等等。關平就問嘞：阿爹，喺陸上打仗使乜用船隻嘅呢？你唔知㗎喇，于禁此人毫無見識，佢嘅七支大軍，好駐扎唔駐扎，偏偏要駐扎喺罾口川噉嘅低窪地方。而家，正係秋雨連綿，襄江必然水漲。我派人用啲沙囊土袋塞住各處河口，等到江水暴漲喇，我軍轉移去高崗安營，然後放水一浸，樊城罾口川嘅曹兵，去同魚蝦做伴啦！啊阿爹嘅妙計無人能及啊！關平服晒喇。而家講下啲魏兵，佢哋駐扎喺罾口川呢，事關連氣幾日大雨滂沱，督將成何就去見于禁話喇：將軍呀，我哋七路大軍駐扎喺川口嚟，地勢咁低，附近雖然有啲山崗，但係離開營地又比較遠嘅。而家秋雨連綿，士兵嘅日子都好難捱㗎。近日有人嚟報告話，荊州兵都轉移晒去啲高崗駐扎喎，又喺漢水河口準備木排、船隻等等。呢萬一江水暴漲，我軍就危險到極喇，請將軍及早採取對策至好啊。哼！你呢個傢伙想擾亂軍心係嘛！有人再敢多嘴嘅，斬！哎呀搞到成何一面屁，行返出嚟就走咗去搵龐德，將件事講佢聽。龐德話：你睇得啱，于將軍唔肯將兵馬轉移，我聽日將本部兵馬移去第處。兩個人噉就商量定啦，哈哈，點知道當晚橫風橫雨。龐德啊仲未瞓喎，佢喺帳篷裏便，突然喺風雨聲中啊仲聽到一種聲，好似萬馬奔騰噉隆隆聲嘅。嘩嚇到龐德大吃一驚啊急忙行出嚟睇下，死咯！只見四面八方，大水沖到嚟喇。七路大軍嘅人馬就亂咁飆亂咁趯，畀啲大水捲走嘅都不計其數。眨下眼，平地水深成丈幾。于禁、龐德以及其他嘅軍官就各自跑上去啲山仔避水啦。等到天光，好喇，關雲長率領荊州軍兵，搖旗吶喊坐住大船嚟到。于禁見到四周圍一片水茫茫，自己身邊呢，只係得返五六十人啫，諗住插翼難飛嘞，立即就大聲嗌話願意投降願意投降噉。哈哈，捉到你喇好！關雲長叫佢哋除去盔甲，解除武裝，拉咗上船押住。然後就再駛船嚟捉龐德。當時龐德啊同埋兩個領軍將校一個董衡一個董超，仲有成何，帶住五百名步兵都係冇着盔甲㗎喇，企晒喺一條堤上便。龐德見到關雲長佢哋坐船嚟到嘞，佢一啲都唔怕，奮起威風準備迎戰。關雲長指揮啲船，喺四面圍到實一實，就命令軍士一齊用箭嚟射，哎呀一陣間咋，就射死成大半魏兵喇。董衡、董超見到情勢危急，就𠼮龐德話喇：龐將軍啊龐將軍，啲士兵已經損失咗成大半喇，四便又冇路走啊，不如投降啦。龐德嬲到極啊：我身受魏王深恩，點能夠屈折於人啊，我殺咗你個膽小鬼！龐德啊真係一刀一個，親自斬咗董衡同董超。大家聽住，再講投降嘅以佢兩個為例！嘩於是人人都奮勇作戰喇。就係噉樣，由天光就一直打到中午，佢哋越打仲越精神添噃。關雲長督住軍兵喺四面加緊進攻。啲箭呀，射到好似落大雨咁密。龐德命令啲軍士準備肉搏啊，佢同成何話喇：勇將唔怕死，壯士不低頭！今日，就係我死嘅日子啊，你努力死戰啦！成何於是拼命衝上前，就畀關雲長一箭射咗佢落水。呢個時候，所有個人都投降晒，就係淨返龐德一個人喺度搏命唧。啱啱有幾十個荊州兵，坐住隻小船逼近條堤。龐德提住大刀，飛身一跳，啪聲跳上小船，嘿呀，好似斬冬瓜咁斬啊，兩下手腳，劈死咗十幾個人噉其餘嗰啲呢，乒乒乓乓跳落水逃命嘞。龐德搶到隻船，佢一手提刀，一手棹槳，就想駛去樊城喎。點知道喺上游嗰處有個將官撐住隻大木排，箭噉樣衝到嚟，嘣一聲就將龐德嗰隻小船當堂撞沉，龐德啊跌咗落水。龐德喺陸上打仗啊確係叻嘞，之一落咗水呢就浸到眼坦坦。木排上面嗰個將官，撞咗龐德落水之後，自己亦跟住嘣聲跳埋落水，一手就擸住龐德將佢生擒活捉咯。呢個將官係邊個呢？係周倉呀！周倉平時係識水性嘅，又喺荊州住咗幾年噉啊水性更熟嘞，兼之又力大，因此今日呢，就畀佢捉到龐德。呢一仗呀，于禁所率領嘅七路大軍，絕大部分都係畀大水浸死嘅。其中有啲識游水嘅呢，諗住亦冇埞趯㗎喇，亦都跪地投降嘞。呢，呢個就叫做關雲長水淹七軍嘞，有詩為證啊：夜半征鼙響震天，襄樊平地作深淵。關公神算誰能及，華夏威名萬古傳。而家講下關雲長，佢返到高崗上便，返入咗中軍帳，坐正喺度，刀斧手將于禁押入嚟。于禁一到啊即刻零林噉跪低，趴喺地處哀求饒命。關雲長問佢：我帶兵嚟到，你點解要抗拒咁斗膽！哎關將軍，呢次皆因上頭差遣，身不由己啊。希望將軍可憐，小將必定誓死效力。哈哈哈哈哈哈，我殺你好比殺豬殺狗，盞整污糟我把刀，人嚟！有！將于禁綁送荊州監牢，等我返嚟再作區處！遵命！走！將于禁押走咗咯。跟住關雲長又叫人押龐德嚟。龐德入到嚟，橫眉怒目，直篤篤噉企喺處唔肯下跪。關雲長話喇：龐德，你大佬而家喺漢中嚟，你舊日嘅主公馬超，亦喺西蜀做大將，你不如投降罷啦。呸！我寧可死於刀下，誓不投降！龐德破口大罵。關雲長發起火嚟，就喝刀斧手將龐德推出去斬首。龐德到死呀，神色不變。講到底，關雲長亦十分敬重龐德係個英雄，就吩咐人將佢安葬好。噉啊，當時關雲長趁住大水未退啊，再次率領人馬上船，去攻打樊城嘞。而家講下樊城，樊城畀水浸啊，周圍白浪滔天，城牆有啲都冧添嘞。啲老百姓呢，男男女女都出嚟擔泥搬磚，補都補唔住。曹軍啲將官都慌晒啦，佢哋走嚟𠼮曹仁話：今日呢種危急形勢，唔係人力所能挽救㗎喇。不如趁敵軍未到，坐船走罷啦。雖然失咗個城，仲可以得返條命啊。嗯，冇法子喇，快啲去準備船隻啦。唔得啊，唔得啊！曹仁正話想逃跑，滿寵就勸佢話喇：唔得啊，啲山洪爆發，唔會浸得好耐嘅，唔使十日就會水退㗎喇。關雲長佢之所以唔敢輕易進攻，係怕我軍襲擊佢嘅後方。如果而家將軍棄城而去，噉黃河以南就再唔係國家所有㗎喇。希望將軍固守樊城作為屏障啊！哎呀呀呀，多謝你嘅指教啊！否則我幾乎誤咗大事！曹仁立即騎馬上城，召集所有嘅將官嚟發誓，佢話：我受魏王之命，固守樊城，凡係有人講要棄城而去嘅，斬！於是大家齊聲話：我哋誓死據守！曹仁好高興嘞，喺城上設置咗幾百支強弓硬弩，督促啲軍士日夜防守警戒。全城嘅居民啊老老嫩嫩，都出嚟擔泥擔石啊填塞城牆。哈果然噃十日度啦，啲水就慢慢退嘞。關雲長自從生擒北魏大將于禁等人就威震天下。呢一日，佢個第二仔關興就嚟到兵營探望佢。關雲長就叫佢帶齊各位文武官員立功嘅文書，送去成都見劉備就請求封賞。噉關興就拜別父親出發去成都嘞，呢處呢就唔多講喇。而家講返關雲長啊，佢親自帶兵四便圍攻樊城。呢一日，關雲長嚟到北門，佢勒定馬企喺處用條馬鞭指住城樓上大聲噉話：嘿！你哋呢班鼠輩聽住，仲唔早早投降，要等幾時啊！佢正喺度嗌緊啊，曹仁喺敵樓上便見到關雲長個身上呢只係披住一件掩心甲，件綠袍呢仲除咗一便衫袖露出手臂添。哼，曹仁急急叫嗰五百名弓弩手嚟，一齊射箭嘩！關雲長急忙勒馬返轉頭。哎呀！右臂上面已經中咗一箭嘞，當堂跌咗落馬。曹仁睇見自己射傷咗關雲長唄，即刻帶兵衝出城嚟。噉啊好彩關平啊早有準備，一輪猛殺就打到佢返轉頭，同時呢救返佢父親回營嘞。返到去，掹出支箭，哎呀！弊喇！原來箭頭係有毒嘅！睇嚟啲毒已經入咗骨添咯，成隻右臂呀又青又腫，唔逳得嘞。關平就慌忙同大家商量話啦：父親傷咗隻手，點仲打得仗呢？不如暫時返去荊州醫下先啦。大家都同意啊，就一齊去見關雲長。關雲長問佢哋：你哋嚟有咩嘢事啊？我哋見到將軍你隻右臂受傷，怕打起仗嚟容易發火，行動又不便。我哋商量過嘞，請將軍暫時班師返去荊州醫治啊。我軍奪取樊城，就在眼前喇。攻陷樊城，就可以長驅直進，殺到去許都，剿滅曹操奸賊，安定漢室。點可以因為小小嘅箭傷就誤咗大事吖？你哋噉樣做，會令到軍心渙散，鬥志鬆懈㗎。畀關雲長教訓咗一輪，關平佢哋只有唔出聲出返去係啦。噉啊大家見到關雲長唔肯退兵，箭傷又唔好得，就到處咁尋訪名醫嘞。有一日，有個人坐隻船仔由江東嚟到要求見關平。關平睇下佢，呢個人戴住四方頭巾，着一件寬闊嘅大袍孭住一個青布袋。佢自己介紹話：我係沛國譙郡人，姓華名佗字元化。我一向都好仰慕關雲長將軍，係天下英雄。近日聽講佢係中咗毒箭，所以特登嚟同佢醫啊。哦！先生莫非就係從前醫過東吳周泰嘅係嘛？冇錯喇冇錯喇。哦今日見到先生，真係好彩喇，先生，請！關平仲歡喜過執到寶啊！即刻同埋眾將官帶華佗入去中軍帳見關雲長嘞。長隻右一，直都痛緊。但係佢又怕影響軍心，所以總係裝作冇事一樣。呢一日，又冇咩消遣，正喺度同馬良捉棋喎。聽講話有個醫生嚟就即刻叫佢入嚟，行過禮就請華佗坐落。奉過茶，華佗就話要睇下隻手臂。關雲長除咗衫袖，伸隻手臂畀華佗睇。噉好仔細噉睇咗一輪華佗就講：射傷手臂嘅箭頭有毒呀，係烏頭藥，毒已經深入到骨頭喇。如果唔及早醫治，呢隻手就冇用㗎喇關將軍。噉用乜嘢藥可以醫呢？我自然有辦法醫嘅。不過，哈哈哈，就係怕將軍你驚唧。哈哈哈哈哈哈哈，我視死如歸，驚乜嘢呢？哈哈哈，誒，你講啦，點樣醫？誒搵笪安靜嘅地方，種一條柱喺度，柱上面要釘一個大鐵圈。噉啊請關將軍你將隻手臂穿過個圈，用繩綁實，然後用張被褸住將軍你嘅頭。我啊用把尖刀嚟割開傷口嘅皮肉，一直割到骨，將骨上便嘅箭毒啊完全刮走佢。噉畀啲藥敷住，用線嚟縫返好個傷口，噉就冇事喇。誒嘿嘿，就係怕將軍你驚唧。哈哈哈哈哈，噉樣呀，容易！使乜又用柱又用鐵圈呢？人嚟，擺酒侍候！喇喇聲擺好席酒嘞。關雲長飲咗幾杯酒，一便同馬良捉棋，一便伸出隻右手叫華佗同佢割。華佗揸住一把尖刀，吩咐個衛士捧住個大盆喺關雲長手臂下便準備接血啊。將軍，我就逳手咯噃，將軍唔使怕㗎。任你醫啦，我唔係嗰啲凡夫俗子怕痛嘅人啊。於是華佗逳手落刀，割開啲皮肉，一直割到見骨。嘩嗨！啲骨呀，已經變咗青色喇。跟住華佗用把刀嚟刮啲骨喎，刮到噘噘聲。中軍帳啲裏裏外外好多人都揞住塊面唔敢睇啊，聽見啲聲都骨痺啦。哈唯獨是關雲長飲酒食肉，談笑捉棋啊一啲都唔覺痛楚喎。好快趣，啲血流到成個盆都滿嘞。華佗刮晒啲毒嘞，敷上藥，用線縫好個傷口。將軍，請你試下逳下隻手。好，等我試下。哈哈，哈哈，哈哈哈哈哈哈哈哈哈哈哈哈。我呢隻手好似從前一樣，點逳都得，一啲都唔痛喇！華佗先生，真係神醫啊！哈哈哈哈哈哈哈。哎我做咗一世醫生，都未曾見過噉嘅。關將軍你係一位天神，天神啊！呢，有詩為證啊：治病須分內外科，世間妙藝苦無多。神威罕及惟關將，聖手能醫說華佗。關雲長個箭傷醫好咗，大排筵席嚟答謝華佗。華佗講：將軍嘅箭傷雖然醫好咗喇，但係務必要小心護理啊，千祈千祈唔好發火，因為怒氣呢，會使到傷口惡化嘅。過咗百日之後就會好返晒，同以前一樣㗎喇。先生你辛苦喇，人嚟！攞一百兩黃金嚟酬謝先生。且慢且慢，我一向敬仰關將軍你義薄雲天，英雄蓋世。所以特意嚟同將軍你醫治嘅啫，我唔係為錢嚟嘅。關將軍珍重，告辭喇。華佗留低一貼藥就辭別關雲長走咗。噉啊關雲長生擒于禁啊斬咗龐德，水淹七軍嘅經過就報到去許都。曹操知道咗之後非常震驚。佢搵齊文武官員嚟商量對策，佢話：關雲長智勇蓋世，而家又据有荊州、襄陽，簡直係如虎添翼啊。唉，于禁被擒，龐德被斬，魏兵銳氣大受挫折。倘若佢哋起兵直攻許都，我如之奈何啊？哎，不如我遷都避佢好過喇！司馬懿話喇：噉唔好啊大王，于禁佢哋畀水浸，呢啲係非戰之罪。同時，對國家大計嚟講亦冇乜嘢太大嘅損害。而家，孫、劉之間關係唔好，關雲長一得勢，孫權梗係唔高興。大王不如派個使者帶封信去東吳，同孫權講明利害，叫孫權暗中起兵去襲擊關雲長嘅後方。我哋應承事情成功之後，割江南嘅土地嚟封畀孫權。噉樣一嚟，樊城嘅危險自自然然就會解除嘅喇。主簿蔣濟就好同意啊，佢話：仲達講得啱啊。大王即刻就派人去東吳，不必遷都咁興師動眾啦。曹操卒之接納佢哋嘅建議，唔遷都嘞。佢好感慨噉對嗰班武將話喇：唉！于禁跟隨孤王三十年，點到估唔到佢臨危嘅時候，反而唔及龐德啊！而家，一方面派人送信去東吳，另一方面，又必須有個大將去頂住關雲長至得噃。曹操說話未完，徐晃就應聲而出話：末將願去啊！曹操十分高興，就撥咗五萬精兵，任命徐晃做主帥，呂建做副手，擇個日子就起兵出發，去陽陵坡駐扎。就命令佢哋啊，當見到東南方便有呼應呢，就開始進攻。

FMT_TIMED_TEXT:A9K2ucmb=12.51 openai.2024-10-31