Börja lära dig lektionen nu

張悦楷講《三國演義》, 113

三洞元帥，分兵三路嚟到進攻。孔明啊叫咗趙雲同魏延兩員大將嚟，哈！之又唔派佢哋出戰喎。啱啱向咗王平同馬忠交帶咗作戰任務唧，孔明又叫張嶷、張翼嚟吩咐佢哋話：你兩個率領一支軍隊，由中路迎敵。今日作好準備，聽日同王平、馬忠一齊出發啦。誒，我啊本來想命令子龍同文長去嘅，不過佢兩位都唔熟悉地理，故此就唔敢用佢哋啊。張嶷、張翼接受命令去咗嘞。嗱，孔明下達命令啊，兩次都提到話趙雲、魏延，唔熟悉地理，故此就唔用佢哋帶兵出戰。嘿，趙雲、魏延呀，就梗係唔高興定㗎啦。孔明話喇：唔係話我唔用你哋兩位啊，皆因兩位嘅年紀都唔輕喇，呢處嘅地形又複雜，好危險啊。萬一畀啲南蠻暗算，就挫折咗我軍嘅銳氣啦。趙雲話喇：如果我哋熟悉呢處嘅地理，又點呢軍師？嗯？哈哈哈哈哈，你兩位一定要小心謹慎，唔好輕舉妄動啊。遵命！趙雲、魏延就好冇癮噉啊出咗去。趙雲就請魏延返去自己嘅營寨商量。趙雲話：我哋兩個係先鋒，但係又話我哋唔熟悉地理，唔肯用。反而，用啲噉嘅後輩上陣，你話我哋醜唔醜啊？趙將軍，我哋兩個而家即刻出去，親自去探下路。捉佢幾個土人返嚟，問清楚情形，叫佢哋帶路去襲擊蠻兵，噉就一戰成功啦嘛。好！啱晒趙雲心水。於是佢兩個就立即上馬，混中路一直行。行咗冇幾多里，遠遠就見到煙塵滾滾就上去山坡望下啦。哦，原來前便有幾十個蠻兵騎住馬飛跑緊過嚟。噉佢兩個就分兩便，一下衝落去，嚇到啲蠻兵嘩嘩聲趯返轉頭。趙雲、魏延就各人都生擒咗幾個蠻兵，帶咗佢哋返去營寨，叫佢哋唔使驚。請佢哋飲酒食飯，然後就詳詳細細噉問佢哋。噉就問清楚喇，原來啊，前便就係金環三結元帥嘅大本營，喺正山口嗰度嚟。大本營旁邊呢，一東一西就兩條路，分別通去五溪洞，同董荼那、阿會喃嘅營寨背後嘅。於是趙雲、魏延就點咗五千名精兵，由捉返嚟嘅蠻兵帶路實行偷襲。佢哋二更出發，趁住有月色一路急行軍就去到金環三結嘅營寨嘅時候呢，大概係四更啦。當時啲蠻兵正話起身煮飯，準備食飽飯啊天光就去同蜀軍打仗嘅。點知趙雲、魏延都唔使你請啊就殺入嚟咯，殺到啲蠻兵亂晒大龍。趙雲飛馬直殺入中軍噉啊啱啱撞正金環三結元帥。交馬一個回合唧，趙雲一槍就㨃咗佢落馬，跟手割咗佢個首級，綁住喺馬頸下便。三扒兩撥，就打到金環三結啲軍隊呀潰散晒。跟住呢，魏延就分一半兵馬，由東路包抄董荼那嘅營寨。趙雲就帶住其餘嗰一半兵馬，由西路包抄阿會喃嘅營寨。噉當佢哋殺到蠻兵營寨嘅時候呢，已經天光大白喇。而家先講下魏延，佢啊殺去董荼那嘅營寨。董荼那聽講話後門畀人哋兜篤將軍唄就急急帶兵出去頂住啦。哈，點知道營寨嘅前門啊，喎嗬噉又響起吶喊聲，原來係王平嘅兵馬殺到。嘩嗨！兩頭夾攻呀，嗰啲蠻兵根本就冇得頂打到零兵賴敗。噉董荼那就搏命走甩咗，魏延呢追佢唔到啊。噉啊趙雲佢帶兵殺到阿會喃寨後嘅時候呢，馬忠已經殺到寨前嘞。又係兩頭夾攻，打到啲蠻兵大敗。阿會喃呢，又趁亂走甩咗。打勝咗仗喇就各自收兵返去見孔明。孔明問喇：三洞蠻兵，走甩兩個洞主，金環三結元帥嘅首級喺邊處啊？趙雲就將首級呈上去獻功。跟住大家又話喇：董荼那、阿會喃，都係掉低匹馬爬山逃跑嘅，所以冇法子追到佢哋啊。孔明哈哈大笑喎：哈哈哈哈哈哈，佢兩個呀，我已經捉到喇。已經捉到呢？大家以為孔明講笑啫都唔信係真嘅。哈點知過咗一陣間，張嶷就押住董荼那嚟到，張翼就押住阿會喃嚟到嘞，大家都驚奇到不得了。孔明話：我睇過呂凱畫嘅地圖，已經知道三洞蠻兵嘅營寨喺邊處㗎喇。故此呢，就用說話嚟激起子龍同文長嘅鬥志。等佢哋深入重地，首先攻破金環三結，跟住就分兵兩路，由背後包抄兩個營寨。我又派王平、馬忠喺寨前接應，哈哈呢個任務呀，非子龍、文長兩位擔當唔起㗎。我啊料定董荼那、阿會喃必定由捷徑混山路走嘅。故此預先派咗張嶷同張翼，埋伏定人馬喺度伏佢，又派咗關索帶兵去接應，所以就捉到佢兩個啦。嘿！人人都服晒啊都話：丞相嘅計謀真係鬼神莫測啊！孔明啊叫人押董荼那同阿會喃入嚟。吩咐同佢哋鬆咗綁，請佢哋飲酒食飯，仲送啲衣服畀佢。囑咐佢哋唔好繼續幫孟獲做壞事喇，然後就放佢哋返洞。董荼那、阿會喃感動到流眼淚啊，叩咗幾個頭就混小路返扯嘞。佢哋走咗之後，孔明就對大家話：聽日孟獲一定會親自帶兵嚟廝殺嘅，到時捉佢就啱喇。於是叫趙雲、魏延嚟，將計策講畀佢哋聽，噉佢哋各帶五千兵就出發嘞。然後孔明再叫王平、關索，率領一支軍隊如此如此噉，王平、關索又出發嘞。孔明調兵遣將完啊，就滋滋悠悠喺中軍帳等候勝利消息嘞喎。好喇，而家講下蠻王孟獲啊。佢一聽見哨馬嘅報告，話三洞元帥都畀孔明捉咗去，部下啲兵卒呀，就好似阿聾燒炮散晒喇噉，嬲到佢吹鬚碌眼，即刻就點起蠻兵去進攻蜀軍。行到半路，就撞正王平嘅兵馬。大家都擺開陣勢。王平呀首先出馬。只見蠻兵陣上門旗一開，幾百名南蠻將軍就騎住高頭大馬，分開兩便排列。然後呢，孟獲喺中間出馬喇。嘩嗨！好威風喎佢。只見佢啊頭戴嵌寶紫金冠，身披纓絡紅錦袍，腰纜碾玉獅子帶，腳穿鷹嘴抹綠靴，騎一匹捲毛赤兔馬，掛兩口松紋鑲寶劍。氣勢昂昂，目空一切啊！佢對左右啲蠻將話喇：人人都話，諸葛亮，好識用兵喎。哈哈，睇下佢呢個陣，旗又亂，啲兵，排個隊都唔得齊整。刀槍劍戟，冇一樣叻得過我嘅！噉樣睇嚟，哼！以前啲人講嘅，冚𠾴唥，都係車大炮嘅！早知如此呀，我作反好耐喇！嗯？你哋，邊個敢去，捉個蜀將返嚟，振奮軍威，嗯？孟獲說話未完，有個蠻將應聲而出，佢叫做忙牙長啊。使一口截頭大刀，騎一匹黃驃馬就衝出去直取王平。兩個人打咗幾個回合，王平虛晃一刀就走。孟獲大喝一聲：追！噉啊帶領蠻兵一路咁追殺過去。噉啊關索上前迎戰啦，打咗幾個回合又走嘞。大約退咗廿幾里啦，孟獲正係追殺得興高采烈。誰知道殺啊噉喊殺連天，左有張嶷右有張翼，兩路蜀軍一齊殺出，截斷咗歸路。王平、關索呀立即帶兵殺返轉頭，前後夾攻就打到蠻兵冇得頂。孟獲帶住一班部下嘅將領呀搏命咁打，殺開條血路啊走甩咗，就向住錦帶山嗰便逃跑。喺佢嘅後便呢，三路蜀兵追殺住過嚟。孟獲啊正在搏命咁趯啊，突然間，前面有一彪軍馬攔住去路。為首一員大將乃係常山趙子龍啊！孟獲一見嘩驚啊，慌失失就混小路趯去錦帶山。趙子龍衝殺咗一輪，打到啲蠻兵嘰嘰呱呱輸到冇得摱就做咗俘虜嘅都無數咁多啊。孟獲啊只係帶住幾十人，騎住馬跑咗入去山谷裏便。後便嘅蜀兵啊追得好緊。佢跑跑下，前便啲路呢就越嚟越窄，啲馬都唔行得。唯有掉低啲馬匹就爬山逃跑啦。誰知道喺山谷之中，沊沊聲噉戰鼓一響，伏兵一齊湧出嚟。原來係魏延根據孔明嘅計策，埋伏定五百名步軍喺呢處嚟嘅。孟獲仲邊度有得頂吖兩下手腳啫，就畀魏延生擒活捉嘞。噉啊跟隨佢嗰啲人呢都投降。魏延押住孟獲返嚟大本營見孔明。孔明呢，早就吩咐人，殺牛劏羊，喺營寨大排筵席等候㗎喇。孔明喺中軍帳裏頭，排列住七重衛兵，刀槍劍戟寒光閃閃；啲儀仗兵呢，就手執御賜嘅黃金鉞斧，打起大紅羅傘；左右兩旁就排列住御林軍，真係氣勢威嚴啊。孔明端端正正坐喺中軍帳內。呢個時候，只見嗰啲俘虜返嚟嘅蠻兵呀嘻嘻㗾㗾噉押到嚟喇，嘿好多人啊。孔明就吩咐同佢哋鬆綁，然後對佢哋話喇：你哋都係好百姓，唔好彩，畀孟獲拉咗去當兵，擔驚受怕，受咗好多苦喇。我諗而家你哋個父母兄弟妻子兒女啊，實係企喺門口望緊你哋返去。如果佢哋聽聞你哋打敗咗仗呀，必定係牽腸掛肚，喊到雙眼都流血咁淒涼個咯。我而家將你哋全部放返去，等你哋各人嘅父母兄弟妻子兒女安心啦。孔明講完說話，就吩咐畀酒畀菜佢哋食，仲送啲米糧畀佢哋然後放走。嗰啲蠻兵呢，初時估話做咗俘虜嘞，就算唔使死啊都要割耳割鼻㗎啦。點知乜都唔係，有得食有得搦，平平安安放返屋企喎嘩！大恩大德啊！個個都感動到流起眼淚，猛咁叩頭多謝然後先至返扯。放走咗蠻兵之後，孔明叫人押孟獲嚟嘞。冇幾耐，前推後擁，將孟獲綁住拉到嚟，𡃈噉啊跪喺孔明面前。孔明問佢：先帝一直都冇待薄你吖，你點解要作反呢？哼哼！兩川嘅地方，本來，都係人哋嘅。你主公，恃住勢力大，就夾硬搶咗佢！自己，封自己做皇帝。哼！我，世世代代，都喺呢處住嘅。係你哋，唔講道理，侵犯我嘅土地，我有咩嘢作反唔作反啊？噉我而家捉到你喇，你心服唔心服呢？荒山路窄，一時唔小心，畀你捉咗，哼！我梗唔服啦。好啦，既然你個心唔服，噉我就放你返去啦，好唔好啊？嗯？你，放我返去？好！等我重整兵馬，同你，決個雌雄！如果你，再捉到我，噉我就服喇！好吖！孔明即刻吩咐同佢鬆綁，畀返衣服佢着，請佢飲酒食飯，仲送匹馬畀佢添，然後呢又放佢走。眾將官見孔明放咗孟獲就問孔明啦：丞相啊，孟獲乃係南蠻嘅巨魁。今日好彩捉到佢返嚟，噉南方就平定咯。丞相點解又要放走佢呢？哈哈哈哈哈哈，我捉佢呀，直情係探囊取物啦。不過一定要降服到佢個心，佢嘅心服嘞，南方就自然平定㗎喇。眾將官聽孔明噉講都唔係好相信嘅。而家講返孟獲。當日佢行到瀘水啊，就遇到佢手下嗰啲殘兵敗將喇。各位，瀘水係喺邊處嚟嘅呢？瀘水呀係古時嘅河流，今日呢已經唔係噉樣叫㗎喇。瀘水指嘅係今日雅礱江下游同金沙江匯合，噉雅礱江以後呢一橛呢就係瀘水，係喺四川、雲南交界嘅地方嚟嘅。噉啊當時嗰啲蠻兵見到孟獲啊，真係又驚又喜，對住孟獲呀猛咁叩頭喎。大王啊大王啊，誒你點返得嚟㗎吓？嘿嘿，嘿嘿嘿嘿嘿嘿。孟獲啊車大炮咯喎：嗰啲蜀兵呀，將我韞喺帳篷裏便，我，睺佢哋冇防備，一用力，啪噉割斷啲繩，殺死咗佢十幾個人，趁住夜晚，黑麻麻就走甩身。行到半路，遇着，佢哋放哨嘅一個馬軍，又畀我殺咗，搶咗佢匹馬，噉就趯返嚟喇！哈哈，哈哈哈哈哈哈，啊哈哈哈哈哈，嗰啲蠻兵歡喜到舞手舞腳。噉啊跟住孟獲渡過咗瀘水扎好個營寨。然後呢，就召集各洞酋長，將嗰啲畀蜀軍俘虜咗，又釋放返嚟嘅蠻兵啊，陸陸續續噉招聚返嚟。噉啊總共仲有十幾萬人喎。呢陣時，董荼那、阿會喃都返咗去自己嘅洞處。孟獲派人去請佢哋。佢兩個都怕孟獲啊，冇法子啦唯有硬住頭皮，率領啲洞兵去係啦。各洞人馬到齊之後，孟獲就命令話喇：大家聽住，諸葛亮啲計仔，我，已經知道晒喇。唔好同佢打，打親，就中佢嘅詭計嘞。我講你哋聽啦，佢哋啲蜀兵呀，喺咁遠嚟到，好勞苦㗎喇。何況，而家正係天熱，佢哋，點住得長㗎。嗱，我哋，憑藉住瀘水，呢個險要地方，將所有嘅船隻、木排，都扣住喺南岸。沿住河岸一帶，築起城牆。總之，挖深啲壕溝，冧高啲堡壘。哈哈，睇下佢諸葛亮，仲出得啲乜嘢計謀！係，係！大王講得啱，大王講得啱啊！嗰班酋長都聽從孟獲嘅命令。噉啊將所有嘅船隻木筏，都撐晒過嚟南岸扣住晒。噉啊沿住河岸一帶啊都築起城牆嘞。又喺嗰啲依傍住山崖嘅地方，搭起高高嘅敵樓，喺上便呢儲備定好多弓弩炮石，就準備長期堅守。糧草呢，都分別由各洞嚟到運輸供給。孟獲以為呢次噉樣嘅部署，係萬全之策喇，佢呀真係一啲都唔憂咯喎。好喇，而家講返下孔明嘞。佢督促軍隊長驅直進，好快佢個先頭部隊已經到達瀘水嘞。呢一日，孔明接到報告話瀘水上便完全冇晒船隻，水流又非常之急。對岸一帶呢築起咗城牆，處處都有蠻兵喺度把守嘅噉話。當時正係五月，熱到呀不得了。特別喺南方嗰度喎，啲日頭呀焫人嘅。士兵嘅盔甲都唔着得咯，着住呀真係焗死嚟啊。孔明接到報告呢就親自去瀘水岸邊觀察咗一番，然後就返去營寨，召集啲將官嚟下達命令。孔明話喇：目前孟獲嘅兵馬駐扎喺瀘水南岸，做咗好多防禦工事嚟抵抗我軍。我既然帶兵嚟到呢處咯，點都唔能夠白行一趟，毫無結果就返去㗎。而家你哋各自率領本部人馬，去選擇一啲樹木茂盛比較陰涼嘅地方，等人馬好好休息下先啦。於是孔明就派咗呂凱，離開瀘水一百里啊選擇咗一啲陰涼嘅地方，建築咗四個營寨。就分配王平、張嶷、張翼、關索，各人就把守一個寨。裏裏外外搭起晒草棚，遮住啲馬匹；同時呢，等啲士兵有啲地方唞涼，避開下啲暑氣。參軍蔣琬見到哎呀乜噉搞法啊，就去問孔明話喇：下官見到呂凱建築嗰啲營寨，覺得非常之唔妥當噃。往日先帝敗於東吳嘅時候啊，啲營寨佈置就係噉㗎喇，而家又犯到正喇。倘若蠻兵偷渡瀘水前嚟劫寨，萬一佢哋用火攻就冇得救嘞噃丞相。哈哈哈哈哈哈，唔使擔心嘅，我自有妙算㗎喇。真係嘅？有咩嘢妙算啊？蔣琬佢哋真係估不出孔明噉樣部署係咩嘢意思嘞。有一日，馬岱喺後方，押運糧食同解暑藥嚟到。馬岱拜見過孔明，就將啲糧草、藥品分派畀四個寨。搞掂晒之後呢，孔明就問佢：馬將軍，你帶咗幾多兵嚟啊？有三千人啊。而家我呢處啲士兵為因打咗咁耐仗，已經非常之疲乏。所以想用你帶嚟嘅兵啊，唔知得唔得呢？啊，大家都係朝廷嘅人馬，使乜分彼此呢？丞相要用萬死不辭啊。好！而家孟獲佢守住瀘水唔過得去，所以我想先切斷佢運糧道路，使到蠻兵自己亂起上嚟啊。請問丞相，點樣切斷法呢？嗱，離開呢度一百二十里，喺瀘水嘅下游有個地方叫做沙口。嗰處嘅水流係比較緩慢，可以扎啲木排撐過去嘅。馬將軍你率領本部三千人馬，渡過瀘水直入蠻洞。首先切斷蠻兵嘅糧道，然後去搵董荼那、阿會喃兩個洞主，設法要佢兩個嚟做內應。遵命！馬岱高高興興接受咗命令就帶兵出發。佢去到沙口之後，就準備過河啦。嗰班士兵見到啲水咁淺，噉啊大多數呢都唔坐木排噃，乾脆除咗衣服，就噉浭水過去。吖，點知過咗一半唧就僂低晒。嘩，弊咯！急急救起啲人返上岸啦。一陣間咁耐唧，口鼻都流血噉就死喇。嚇到馬岱驚晒，漏夜趕返去講畀孔明知。乜有噉嘅事咩？孔明就即刻叫嚮導嚟問佢。個嚮導係土人嚟嘅，佢話：而家係天熱呀，啲毒呀，聚晒喺瀘水入便。日頭啊熱吖嘛，啲毒氣啊發出嚟喇。如果有人過河就一定中毒嘅。如果飲親啲水啊，個人係實死㗎。哦，噉點先至過得河呢？誒，要過河都得嘅，不過就唔能夠喺日頭。一定要等到夜靜喇，啲水涼返喇，毒氣唔發出嚟喇。喺呢個時候，過河又好，飲水亦好，就冇事㗎喇。原來噉嘅。孔明就叫呢個嚮導土人帶路，挑選咗五六百個精壯嘅士兵，跟住馬岱去到沙口。扎起木排，喺半夜過河，哈！果然係冇事喎，得法喇！於是全部人馬平平安安都過晒河。馬岱帶住二千名精壯士兵，由土人帶路直取夾山峪。夾山峪嘅形勢啊非常之險要，呢，兩便都係山，中間係一條路，只能夠一人一馬噉過個啫。嘿真係好話唔好聽啊，個人肥啲都唔過得嘅。呢處呀，係蠻洞運糧嘅必經之路。噉馬岱佔據咗夾山峪就扎好營寨先。啲蠻兵仲烏瀡瀡喎。嗰日咿誒咿誒噉啊解糧嚟到，畀馬岱一前一後截住，搶咗佢百幾部糧車。噉啊走甩嗰啲蠻兵就返去報告孟獲知嘞。孟獲呢陣時就喺個寨嚟，就都唔知幾疏肝啊，終之無日就飲酒快樂，連軍務都放鬆晒唔理咯。呢一日，佢正係同一班酋長喺度飲酒，個個都飲到塊面呀豬肝噉色。孟獲就對嗰班酋長話喇：我哋啊，若果同諸葛亮對敵呢，就實中佢嘅奸計嘅。而家，就唔怕佢喇。有一條，咁險要嘅瀘水，做屏障，我哋，牢牢噉守住，哈哈，硬係唔同佢打。嗰啲蜀兵，受唔住咁熱，必定要撤退嘅。到其時呀，我，帶住你哋，追住蜀兵後便，猛打，實捉到諸葛亮嘅！嘿嘿，嘿嘿嘿嘿嘿嘿嘿嘿嘿嘿。忽然間有個酋長話喇：哎呀，大王啊大王，沙口嗰度地方啲水好淺嘅咋喎。如果畀蜀兵喺嗰度鑽咗過嚟呀就攞命喇，要派啲兵去守住嗰度至得啊。哈哈哈哈哈哈哈哈，你係呢處嘅人，土生土長，乜你仲唔知呀？蜀兵，要喺嗰度過河呀，我，真係巴不得喇。一過河，實死晒喺條河處都得喇。誒，誒唔係噃大王，如果有人，教蜀兵夜晚過河呢，噉，噉又點算啊？唓！使乜憂心，我哋嘅人，點肯幫助敵人嘅呢？冇有怕！冇有怕？冇有怕嘅，飲！正喺度飲緊酒，有人嚟報告話有好多蜀兵，偷渡瀘水，切斷咗夾山峪糧道，係打住平北將軍馬岱旗號嘅噉。孟獲話喇：哼哼，諒佢區區小輩，算得乜嘢！冇有怕嘅！就派咗副將忙牙長，帶三千蠻兵趕去夾山峪嘞。而家講下馬岱，佢見到蠻兵嚟到，就出齊兩千人馬，擺晒喺大山前便。兩陣對圓，忙牙長呀出馬同馬岱交鋒。嘿，一個回合咋，畀馬岱一刀，即刻就變咗冇有怕咯。咩嘢冇有怕？斬死咗乜嘢都唔使怕喇。噉啲蠻兵大敗就趯返去見孟獲，話馬岱好犀利嘅噉。孟獲就叫啲將官嚟，問邊個敢去同馬岱打過。董荼那行出嚟話佢敢去。孟獲就好歡喜啦叫佢帶三千兵去。孟獲呢次就唔敢大意喇，佢怕諸葛亮又試派人偷渡瀘水啊。所以呢，即刻就派阿會喃帶三千人馬去把守住沙口嘞。

FMT_TIMED_TEXT:A9K2ucmb=11.84 openai.2024-10-31