ماذا تعرف عن فيزياء الأجسام الدوارة؟ | النيرد العربي
خلنا نتفق
أنه الأجسام الدوارة غريبة جدًا
فتشوفلك جسم لطيف
يتحرك وفق قوانين نيوتن للحركة
ولكن لما تبدأ تنطيه دوران
شغلات غريبة راح تبدأ تصير
فهذه العجلة إحنا شادينها من طرف واحد
من هذا الطرف
لذلك لما أتركها هسا
راح تطيح بسبب الجاذبية
لأن الجاذبية جاية تسلط عليها قوة
ولكن إذا أنطيتها دوران
دوران كلش زين
راح تشوفون إنه هذه العجلة راح تتوازن
وهيتشي ترتفع بالهواء
وكأنما الجاذبية
اختفت تمامًا
ما إلها أي تأثير على هذه العجلة
لأن مثل ما قلتلكم
الأجسام الدوارة غريبة جدًا
فأنا علي السالمي
وهذه حلقة جديدة من النيرد العربي
أريدكم تركزون وياي
تشتركون بالقناة وتفعلون زر الجرس
حتى نتعلم أكثر
عن غرابة الأجسام الدوارة
تفسير هاي الحالة الغريبة
اللي شفناها ببداية هاي التجربة
هو مبدأ فيزيائي يسمونه الزخم الزاوي
الزخم الزاوي هو ميلان الجسم الدوّار
أو إنه يبقى بنفس حالته الحركية
فمثلًا هاي العجلة
إذا أنطيتها دوران بهذا الاتجاه
راح يتولد بيها زخم زاوي
يكون عامودي على القرص مالت الدوران
ويكون بهذا الاتجاه
اللي هو حسب قاعدة الكفة اليمنى
أفرّ أصابعي ويا الدوران
فاتجاه الإبهام راح يكون هو اتجاه الزخم الزاوي
أما إذا فريتها عكس الاتجاه
فراح يكون الزخم الزاوي بهذا الاتجاه
اللي يكون عليّ
لأن عكسنا اتجاه الدوران
كذلك أكو شغلة غريبة بالأجسام الدوارة
هو لما نسلط عليها قوة بنقطة معينة
ما تتصرف نفس الأجسام العادية
مثل هذه الكرة
فهاي الكرة مثلًا
لما أذبها لفوق
أسلط عليها قوة لأعلى
يكون اتجاه حركتها بنفس اتجاه القوة
اللي سلطتها عليها
ولكن الأجسام الدوارة تقول لك لا عيني
انا راح أتأثر باتجاه يكون عمودي على تأثير القوة
وحسب اتجاه الدوران مالتي
فمثلًا هذه العجلة إذا ما جاي تدور
ودفعتها بهذا الاتجاه
يعني سلطت عليها قوة
راح تندفع للأمام هذا شيء طبيعي
ولكن إذا فرّيتها
وسلطت عليها نفس القوة
راح يكون التأثير بمنطقة مختلفة تمامًا
فهسا راح ادفعها للأمام بإيدي
راح تشوفون أنه هي دارت
فأنا سلطت عليها قوة بهاي النقطة
ولكن التأثير مالتها صار بعد 90 درجة من هذه النقطة
كذلك نفس الشيء إذا سلطت القوة باتجاه معاكس
راح تشوفون إن هي تفتر بهذا الاتجاه
هسا خلنا نطبق كل شيء تعلمناه
على الأجسام الدوارة
من الزخم الزاوي وشلون تتأثر بالقوة
حتى نفسّر ليش هاي العجلة تطوف بالهواء لما نفرّها
فخلنا بالبداية ننطيها شوية دوران
هسا هاي العجلة عندها زخم زاوي
راح يكون بهذا الاتجاه
وبنفس الوقت هي جاي تعرض لقوة الجاذبية
اللي جاي تسحبها للأسفل
ولكن إحنا تعلمنا أنه الأجسام الدوارة
إذا تسلطت عليها قوة
يكون التأثير بنقطه 90 درجة من تأثير القوة
فهسا الجاذبية جاي تسحبها للأسفل بهذا الاتجاه
ولكن التأثير جاي يصير بهذا الاتجاه
لذلك هي بدل ما تسقط للأسفل
فالتأثير جاي يصير بهذه النقطة
لذلك هي راح تظل تفتر وتفتر وتفتر
ما دام هي تفتر أيضًا بهذا الاتجاه
إلى أن قوى الاحتكاك راح تتغلب على الدوران
فبالتالي راح ينتهي الزخم الزاوي مالتها
وتتغلب عليها الجاذبية وتطيح بالأرض
هسا راح نسوي تجربة ثانية
نطبق بيها مبادئ الزخم الزاوي
وشلون الأجسام الدوّارة تتأثر بالقوة
حتى نتعلم عليهم أكثر ونفتهمهم بشكل أفضل
فهسا أنا قاعد على هذا الكرسي الدوّار
اللي يفتر بحريّة
وهذه العجلة قدامي
راح ننطيها شوية دوران
وامسكها بهاي الطريقة
فهسا راح أفر هاي العجلة وأشوف شنو يصير
تلاحظون أنه أنا جسمي أيضًا جاي يدور
أنا والكرسي اللي يفتر بحريّة
وكأنه معكم قوة جاي تتسلط عليه وجاي تفرني
وهاي القوة بالحقيقة جاي تيجني من هذه العجلة
اللي صار هنا هو نفس اللي صار من ساع بالضبط
لما كنا العجلة معلقينها بالحبل من هذه النقطة
ولكن الترتيب صار مختلف شوية
فأنا لما فريت العجلة صار بيها زخم زاوي
هذا الزخم الزاوي قلنا يكون عامودي
على القرص مالت الدوران
راح يصير بهذا الاتجاه
من ساع قلنا أيضًا أنه الأجسام الدوّارة
إذا سلطنا عليها قوة بنقطة معينة
التأثير راح يصير بعد 90 درجة من نقطة تأثير القوة
فإذا أنا أنطيتها قوة بهذا الاتجاه
يعني سلطت عليها قوة هنا
فالتأثير وين راح يصير؟
بهذه النقطة وبهذا الاتجاه
بس لأن أنا ماسكها بإيدي الاثنين
فهاي القوة راح تنتقل إلي مالت دوران العجلة
وراح تفر إيدي من هنا
وتفر هاي إيدي لقدام
وجسمي كله راح يفتر بهذا الاتجاه
فهسا راح نعيدها مرة ثانية وتشوفوها
هسا أنا فارها في هالاتجاه
راح أسلط عليها قوة من هنا فأنا راح أدور وين؟
بهذا الاتجاه
ونفس الشيء إذا فريتها بالعكس
تأثير القوة راح يصير بالاتجاه المعاكس
فالزخم الزاوي وفيزياء الأجسام الدوّارة كلش مهمة
فمن خلالها ندرس حركة الكواكب
والأقمار الطبيعية وكذلك الصناعية
وأتمنى تكونون من خلال هاي التجارب
تعلمتم عنها وبطريقة جديدة
